პოლიტიკა

ნინო გვენეტაძემ ძალიან ბევრის ნდობა ვერ გაამართლა - ანა ნაცვლიშვილი

პრეზიდენტის საპარლამენტო მდივნის ანა ნაცვლიშვილის განცხადებით, იუსტიციის უმაღლესი საბჭოს ყოფილმა თავმჯდომარემ ნინო გვენეტაძემ მისი მოლოდინი ვერ გაამართლა.

„ნინო გვენეტაძის კანდიდატურა თავის დროზე პარლამენტს წარედგინა კონსულტაციების საფუძველზე. პრეზიდენტი ღიად აღიარებდა, არ გაურბოდა იმის თქმას, რომ ნინო გვენეტაძემ მისი და სხვა ბევრი ჯგუფის იმედები ვერ გაამართლა. მეც გაცილებით მეტი მოლოდინი მქონდა მისგან, თუმცა სამწუხაროა, რომ ეს მოლოდინი არ გამართლდა. ნინო გვენეტაძემ ვერ გაამართლა ძალიან ბევრის ნდობა, თუმცა მას არანაირი ხელშეწყობა იუსტიციის სამინისტროსგან და პარლამენტისგან არ ჰქონია. შესაბამისად, ეს შედეგები, რაც მივიღეთ სასამართლო სისტემაში, არ არის სწორი, მხოლოდ ერთ ადამიანს დაბრალდეს“, - განაცხადა ნაცვლიშვილმა.

ნაცვლიშვილის თქმით, კანდიდატის შერჩევა მოხდება კონსულტაციების საფუძველზე.

„ჩვენ გვინდა, მოვისმინოთ, თუ როგორ უნდა დაიგეგმოს პროცესი, რომ მივიღოთ საუკეთესო შედეგი, როგორ წარმოუდგენიათ აკადემიური წრეების წარმომადგენლებს პროცესის მართვა. ეს შეხვედრა ემსახურება პროცედურებისა და კრიტერიუმების შესახებ მოსაზრებების მოსმენას. სხვა წრეებთანაც იქნება შეხვედრა. რა თქმა უნდა, იქნება კონსულტაციები პარლამენტთან.

კონსტიტუციის მიხედვით, პრეზიდენტს კანდიდატის შერჩევის ექსკლუზიური უფლებამოსილება აქვს. მას შეუძლია, არავის არ ჰკითხოს აზრი, მაგრამ პრეზიდენტი იქცევა სხვაგვარად გამომდინარე იმ როლიდან, რომელიც სავალალო მდგომარეობაში მყოფი სასამართლოს თავმჯდომარეს დაეკისრება. აქედან გამომდინარე, პრეზიდენტი ფართო კონსულტაციების შედეგად გამოვლენილ კანდიდატს წარადგენს",- აღნიშნა ნაცვლიშვილმა.

ამ წუთებში პრეზიდენტის ადმინისტრაციის წარმომადგენლები უზენაესი სასამართლოს თავმჯდომარეობის კანდიდატურასთან დაკავშირებით აკადემიური წრეების წარმომადგენლებს ხვდებიან.

ცნობისთვის, გასულ კვირას უზენაესი სასამართლოს თავმჯდომარემ, ნინო გვენეტაძემ ჯანმრთელობის მდგომარეობის მიზეზით, თანამდებობა დატოვა. პრეზიდენტი ახალი თავმჯდომარეობის კანდიდატის შერჩევას დღეიდან იწყებს.