სამართალი

ნიკა გვარამიას ადვოკატი ძალადობის მუხლის გადაკვალიფიცირებას მოითხოვს

ტელეკომპანია რუსთავი 2-ის გენერალური დირექტორის, ნიკა გვარამიას ადვოკატი მისი დაცვის ქვეშ მყოფის მიმართ განხორცილებული ქმედების ფაქტზე ძალადობის მუხლით დაწყებული გამოძიების გადაკვალიფიცირებას მოთხოვს.

დიმიტრი საძაგლიშვილის თქმით, გამოძიება უნდა მიმდინარეობდეს მუხლით, რომელიც გულისხმობს პოლიტიკური შეხედულებების ან საზოგადოებრივი აქტივობის გამო ძალადობით ჩადენილ დევნას.

მისი შეფასებით, ის მუხლი, რომლითაც ამჟამად მიმდინარეობს გამოძიება, აბსურდულია.

"126-ე მუხლით ამ ქმედების დაკვალიფიცირება შეიძლება მიზნად ისახავდეს მხოლოდ და მხოლოდ იმას, რომ მსუბუქი სასჯელი იქნეს გამოყენებული დამნაშავის მიმართ და შესაბამისად, მას არ დაეკისროს პასუხისმგებლობა კანონის გათვალისწინებული წესით,“ - აცხადებს დიმიტრი საძაგლიშვილი.

მუხლის გადაკვალიფიცირებას მოითხოვს თავად ნიკა გვარამიაც.

“თუ ჩემ წინააღმდეგ ჩადენილ დანაშაულს მოტივი არ ჰქონდა, მაშინ ჯგუფური ხულიგნობაა. თუ მოტივი ჩემი პოლიტიკური და საზოგადოებრივი საქმიანობაა, მაშინ სიძულვილის დანაშაულია და დევნა ძალის გამოყენებით. კვალიფიკაცია, რომელიც ჯერ-ჯერობით აქვს საქმეს - ძალადობა, სრულიად არაადეკვატურია. თავდასხმა იყო ჯგუფური," - აცხადებს ნიკა გვარამია.

ცნობისათვის: რუსთავი 2-ის გენერალური დირექტორის, ნიკა გვარამიას ცემის ფაქტზე რატი გაჩეჩილაძე დააკავეს. ინფორმაციას ამის შესახებ შინაგან საქმეთა სამინისტრო ავრცელებს.

"შსს-ს თბილისის პოლიციის დეპარტამენტის დეტექტივების სამმართველოს თანამშრომლებმა, ჩატარებული საგამოძიებო მოქმედებების შედეგად, 1986 წელს დაბადებული რ.გ. დააკავეს. გამოძიებამ დაადგინა, რომ ბრალდებულმა მიმდინარე წლის 7 იანვარს თბილისში, რესტორან "დაინინგ რუმში" ფიზიკური და სიტყვიერი შეურაცხყოფა მიაყენა 1976 წელს დაბადებულ ნ.გ.-ს", - ნათქვამია განცხადებაში.

გამოძიება საქართველოს სსკ-ს 126-ე მუხლის 1-ლი ნაწილით მიმდინარეობს, რაც ითალისწინებს სისტემატურ ცემას ან სხვაგვარი ძალადობას, რამაც დაზარალებულის ფიზიკური ან ფსიქიკური ტანჯვა გამოიწვია.

ნინო ექვთიმიშვილი