პოლიტიკა

ნიკა გვარამია რომ ამბობს, ეს ნიშნავს რომ უკვე სარწმუნოა? - ეკა ბესელია

საპარლამენტო უმრავლესობის წევრის, ვანო ზარდიაშვილის განცხადებით, ტელეკომპანია რუსთავი2-ის გენერალური დირექტორის ნიკა გვარამიას დღევანდელი განცხადება აბსურდის თეატრია.

როგორც ზარდიაშვილმა „იმედს“ განუცხადა, იგი არც პირველი, არც მეორე და არც მესამე ინსტანციის მოსამართლეებს არ იცნობს.

„ნიკა გვარამიას აბსურდულ თეატრზე რა კომენტარის გაკეთება შეიძლება. წარმოდგენა არ მაქვს, რატომ მაკავშირებს მე იმ ხალხთან და საერთოდ რუსთავის 2 განმხილველ მოსამართლეებთან, რომელსაც საერთოდ არავის არ ვიცნობ. არც პირველი ინსტანციის მოსამართლეებს ვიცნობ, არც მეორესი, არც მესამესი. დანარჩენი არის სრული აბსურდის თეატრი“,-აღნიშნა ზარდიაშვილმა.

პარლამენტის იურიდიული კომიტეტის თავჯმდომარის ეკა ბესელიას განცხადებით კი, მას ნიკა გვარამიას ნათქვამის არ სჯერა.

„ნიკა გვარამია რომ ამბობს, ეს ნიშნავს რომ უკვე სარწმუნოა? ბრალდება ყველაფერზე შეიძლება ისმოდეს და X და Y წყარო, რაღაც ინკოგნიტო ამბობს, რომ შესაძლოა ზეწოლა ხორციელდებოდეს. ოთხი გვარი მოვისმინე, ახლა მეხუთე, შემდეგ მეექვსე გვარი ვინ არის? ზარდიაშვილზე რა უნდა გითხრათ? სერიოზულად მეკითხებით? მე სერიოზულად ამ კითხვას ვერ ვღებულობ“,-განაცხადა ბესელიამ.

ნიკა გვარამიას განცხადებით, 3 დღის განმავლობაში სასამართლოზე იქნება უპრეცედენტო ზეწოლა და ამ ზეწოლის განმახორციელებლად არის არჩეული „ახალი ადამიანი, რომელიც არის ბიძინა ივანიშვილის ახალი დავალებების შემსრულებელი „ზონდერი“ - ივანე ზარდიაშვილი. დღეს ეს ადამიანი მოხვდა პარლამენტში და არის ეკა ბესელიას პირველი მოადგილე“.

მონიკა დავლიანიძე