სამართალი

ნიკა გვარამია კრიმინალური პოლიციის დეპარტამენტში გამოკითხეს

რუსთავი 2-ის გენერალური დირექტორი ნიკა გვარამია დღეს შს სამინისტროს კრიმინალური პოლიციის დეპარტამენტში გამოკითხვაზე 3 საათის განმავლობაში იმყოფებოდა.

როგორც გვარამიამ დაკითხვიდან გამოსვლის შემდეგ განაცხადა, გამოძიებას კითხვები კომპიუტერულ სისტემაში უნებართვოდ შეღწევასა და პირადი საუბრების უკანონოდ მოპოვება-გავრცელების საქმესთან დაკავშირებით ჰქონდა. საუბარია, ნიკა გვარამიასა და მამუკა ახვლედიანის საუბრის ჩანაწერის გავრცელების ფაქტზე.

,,საუბარი, რომელიც არის განთავსებული ინტერნეტში, არის ჩემი ჩაწერილი. მე ვარ ნამდვილად, ჩემი ხმაა, მაგრამ ეს საუბარი არის დამონტაჟებული იმგვარად, რომ ჩრდილი მიაყენოს ბატონ მამუკა ახვლედიანს. ამ საუბარში არავითარი ქრთამის შეთავაზება ან რაიმე ტიპის ფულადი შეთავაზება ახვლედიანის მიმართულებით არ ყოფილა ან რატომ უნდა შეგვეთავაზებინა, ბატონი ახვლედიანი გადაწყვეტილებებს იმ საკითხთან დაკავშირებით, რომელიც რუსთავი 2-ს ეხებოდა, არ იღებდა’’, - განაცხადა ნიკა გვარამიამ.

მისივე თქმით, გამოძიების იმედი არ აქვს.

,,არავითარი იმედი არ მაქვს, იმიტომ, რომ ეს იმართება ამავე შენობიდან. შესაბამისად, შეუძლებელია, რომ ეს შენობა ერთი ხელით ამ ჩანაწერებს აკეთებდეს და აქვეყნებდეს და მეორე ხელით იძიებდეს საკუთარი თავის წინააღმდეგ’’, - განაცხადა ნიკა გვარამიამ.

ნინო ექვთიმიშვილი