პოლიტიკა

ნაზი ჯანეზაშვილი პროტესტის ნიშნად იუსტიციის უმაღლესი საბჭოს სხდომაზე ახალშობილ შვილთან ერთად მივიდა

იუსტიციის უმაღლესი საბჭოს არამოსამართლე წევრი, ნაზი ჯანეზაშვილი საბჭოს დღევანდელ სხდომაზე სიმბოლურად თავის ახალშობილ შვილთან ერთად მივიდა. ამ ფორმით ჯანეზაშვილმა სასამართლო სისტემის ჩაკეტილობას ხაზი გაუსვა და აღნიშნა, რომ მას არ სურს, მომავალმა თაობამ არსებული სასამართლო სისტემის პირობებში იცხოვროს.

ჯანეზაშვილის განცხადებით, დახურული მმართველობის სისტემა უნდა შეიცვალოს, რათა უზენაესი სასამართლო „ჩინჩალაძის კლანის ხელში უვადოდ“ არ აღმოჩნდეს.

იუსტიციის საბჭოს არამოსამართლე წევრის განმარტებით, თუ საბჭომ დახურული მმართველობის სისტემა არ შეცვალა, 25 წლის შემდეგ მისი შვილების თაობასაც ისევ სასამართლო რეფორმაზე მოუწევთ მუშაობა და ისევ იმავე კლანს დაუპირისპირდებიან, რომლიც დღეს სისტემას მართავს.

„ამიტომ მოვედი დღეს ჩემს შვილთან ერთად აქ, რომ დღეს არის დღის წესრიგში შეტანილი საკითხი, რომელიც ეხება უზენაესი სასამართლოს წევრების არჩევას და მე მინდა მოვუწოდო იუსტიციის საბჭოს, რომ ისინი შესაძლებელია, დღეისთვის ცდილობენ, რომ თავის თანამდებობები გაიმყარონ და შეიძლება ცდილობენ, რომ უზენაესშიც გაიმყარონ თავის პოზიციები, მაგრამ მე მიმაჩნია, რომ ძალიან მნიშვნელოვანია, ჩვენ ვიზრუნოთ ჩვენს შვილებზე და მე ნამდვილად არ მინდა, ჩემი შვილი ცხოვროებდეს იმ ქვეყანაში, სადაც 25 წლის შემდეგად მათ თაობას მოუწიოს, რომ ჩინჩალაძის კლანს ებრძოლოს“,- განაცხადა ჯანეზაშვილმა.

ნაზი ჯანეზაშვილმა წინა სხდომაზე საბჭოს შესთავაზა პროექტი, რომელიც რეგლამენტში ცვლილებებს ითვალისწინებდა. პროექტის მთავარი მიზანი, უზენაესი სასამართლოს მოსამართლეების კონკურსის წესით არჩევა იყო. ჯანეზაშვილის თქმით, საბჭოს წევრებმა მისი პროექტი ჩააგდეს.

იუსტიციის უმაღლესი საბჭო დღევანდელ სხდომაზე უზენაესი სასამართლოს წევრების წარდგენის შესახებ მსჯელობს.