პოლიტიკა

ნაციონალურმა მოძრაობამ ზაალ უდუმაშვილის საარჩევნო შტაბის ხელმძღვანელი წარადგინა

ნაციონალური მოძრაობის თბილისის მერობის კანდიდატმა ზაალ უდუმაშვილმა, საარჩევნო შტაბის ხელმძღვანელად, გრიგოლ ვაშაძე წარადგინა.

როგორც უდუმაშვილმა პრესკონფერენციაზე აღნიშნა, ვაშაძე არის სწორედ ის ადამიანი, რომელსაც ის ცოდნა გააჩნია, რომელიც მის საარჩევნო შტაბს გამოადგება.

„მინდა წარმოგიდგინოთ ჩემი საარჩევნო შტაბის ხელძღავნელი. ჩემთვის ძალიან დიდი პატივია, რომ ეს ადამიანი დათანხმდა ჩემს თხოვნას, რომ უხელმძღვანელოს ჩემს შტაბს. ადამიანი, რომელსაც უდიდესი გამოცდილება და ცოდნა აქვს, რომელიც მე ძალიან გამომადგება წინასაარჩევნო პერიოდში. ის არის საქართველოს საგარეო საქმეთა ყოფილი მინისტრი, გამორჩეული დიპლომატი და რაც მთავრია ღირსეული პიროვნება და ამ ქვეყნის ღირსეული შვილი, ბატონი გრიგოლ ვაშაძე“,-განაცხადა მერობის კანდიდატმა.

თავად ვაშაძემ აღნიშნა, რომ მისთვის „დიდი პატივია ის ფუნქცია რაც პარტიამ დაავალა და რაც ზალიკოს გადაწყვეტილება არის“.

გრიგოლ ვაშაძის თქმით, ზაალ უდუმაშვილს არჩევნებში ყველა ის ადამიანი მისცემს ხმას, ვისაც „მობეზრდა ნეპოტიზმი, ეკონომიკური უკუსვლა, ვისაც მობეზრდა დაპირებები, რომელიც არ სრულდება და ვერ შესრულდება, იმიტომ რომ დილეტანტების მიერ არის გაცემული“.

მონიკა დავლიანიძე