პოლიტიკა

ნაციონალურმა მოძრაობამ ბიუჯეტთან დაკავშირებით თბილის მერიას შენიშვნები გადაუგზავნა

თბილისის საკრებულოს ნაციონალური მოძრაობის წევრებმა დედაქალაქის მერიას ბიუჯეტის პროექტთან დაკავშირებული შენიშვნები გადაუგზავნეს.

როგორც ნაციონალური მოძრაობის წარმომადგენელმა, ირაკლი ნადირაძემ ჟურნალისტებს განუცხადა, საუბარია ხუთ შენიშვნაზე.

კერძოდ, ოპოზიციური ფრაქციის წევრების მოსაზრებით, უნდა გაიზარდოს ეკოლოგიის და ინფრასტრუქტურის ხარჯები.

ასევე რეკომენდაციის თანახმად, სამჯერ უნდა გაიზარდოს უფასო სასადილოების დაფინანსება.
ნაციონალური მოძრაობის მოთხოვნით, სტუდენტებისთვის მუნიციპალური ტრანსპორტით მგზავრობა უნდა იყოს უფასო.

ამასთან, როგორც ირაკლი ნადირაძემ აღნიშნა, ბიუჯეტში უნდა აისახოს ისიც, რომ პენსიონერებს მედიკამენტებისთვის 200-ლარიანი ვაუჩერი დაურიგდეს.

ასევე, ენმ-ის წევრები მოითხოვენ, რომ 150-ლარიანი ვაუჩერები დარიგდეს დაბალ და საშუალო შემოსავლიანი ოჯახებისთვის.

ამასთან, ნაციონალური მოძრაობა ითხოვს, რომ თბილისის მერიაში გაუქმდეს რამდენიმე საქალაქო სამსახური, მათ შორის უსაფრთხოების სამსახური და მის ნაცვლად უწყებაში დაცვის პოლიცია შევიდეს, რაც ენმ-ს მტკიცებით, თბილისის ბიუჯეტიდან დაზოგავს 4 მილიონ ლარს.

,,თბილისის მერის, კახა კალაძეს ვუგზავნით საკმაოდ სქელტანიან დოკუმენტს, სადაც ყველა ჩვენი მოთხოვნა, წინადადება იქნება ასახული, მათ შორის ვაყენებთ 5 ძირითად მოთხოვნას. ვფიქრობთ, რომ უნდა მოხდეს როგორც სტრუქტურული ოპტიმიზაცია, ისე საშტატო ოპტიმიზაცია. მათ შორის უნდა გაუქმდეს უსაფრთხოებიოს საქალაქო სამსახური და მის ნაცვლად შემოვიდეს დაცვის პოლიცია“, - განაცხადა ირაკლი ნადირაძემ.

ნინო ექვთიმიშვილი