პოლიტიკა

ნაციონალური მოძრაობის რღვევა თუ დაიწყო, მე არ დამწყდება გული, ისევე, როგორც ბევრ სხვას - ბექა ნაცვლიშვილი

„ქართული ოცნების“ წევრი, ისნის რაიონის მაჟორიტარობის კანდიდატი, ბექა ნაცვლიშვილი სანდრა რულოვსის მიერ კანდიდატურის მოხსნის ფაქტს ეხმაურება და უახლოეს მომავალში „ნაციონალური მოძრაობის“ დაშლას პროგნოზირებს.

როგორც მან დღევანდელ პრესკონფერენციაზე განაცხადა, პარტიაში ამჟამად სერიოზული დაპირისპირებაა.

“სანდრა რულოვსის მიერ კანდიდატურის მოხსნა იმაზე მეტყველებს, რომ „ნაციონალური მოძრაობა“ ორად არის გაყოფილი. ეს არის სააკაშვილისა და ბოკერიას გუნდები, მათდა სამწუხაროდ, არც ერთ მათგანს არ აქვს ისეთი პოლიტიკური წარსული და ავტორიტეტი, რომ რაიმე ზემოქმედება მოხდინონ საზოგადოებაზე.

ამ დაპირისპირებამ შესაძლოა, მოვლენების სხვაგვარი განვითარება გამოიწვიოს, მაგალითად, დაიწყოს „ნაციონალური მოძრაობის“, როგორც პარტიის, პოლიტიკური რღვევა, რაზეც მე ნამდვილად არ დამწყდება გული, ისევე, როგორც ბევრ სხვას“, – განაცხადა ბექა ნაცვლიშვილმა.

ნინო ექვთიმიშვილი