პოლიტიკა

„ნაციონალური მოძრაობის“ იდეა ე.წ. ფარულ მოსმენებთან დაკავშირებით საინტერესოა - უჩა ნანუაშვილი

დღეს საპარლამენტო ფრაქცია „ერთიანი ნაციონალური მოძრაობის“ წევრები სახალხო დამცველ უჩა ნანუაშვილს შეხვდნენ და განიხილეს ოპოზიციის ალტერნატიული ხედვა ე.წ. ფარული მოსმენების კანონის შესახებ.

უჩა ნანუაშვილმა განაცხადა, რომ ოპოზიციის იდეას იზიარებს.

„ეს ინიციატივა ნამდვილად საინტერესოა. ჩვენ გარკვეული დეტალები გავიარეთ, თუმცა, რაღაც დასაზუსტებელია. მე ვფიქრობ, რომ იდეა საინტერესოა, მითუმეტეს იმ ფონზე, როცა საყოველთაო უნდობლობა არსებობს ამ საკითხთან დაკავშირებით საზოგადოებაში, რომ ჩვენ გარკვეულწილად დამატებითი მექანიზმი გავხდებით იმისთვის, რომ მოსმენების საკითხი ქვეყანაში სამუდამოდ დამთავრდეს“, - განაცხადა ნანუაშვილმა შეხვედრის დასრულების შემდეგ.

„ნაციონალური მოძრაობა“ ე.წ. ფარული მოსმენების განხორციელების ორგასაღებიან პრინციპს ემხრობა, სადაც ერთი გასაღები დამოუკიდებელ უწყებაში იქნება, ხოლო მეორე - სასამართლოში. გარდა ამისა, ისინი ითხოვენ, რომ პარლამენტის ორმა წევრმა, ერთი ოპოზიციიდან, მეორე - უმრავლესობიდან, და სახალხო დამცველმა აღნიშნული უწყების მონიტორინგი ჩაატარონ.

შეგახსენებთ, რომ პარლამენტში მეორე მოსმენით განიხილავენ საკონსტიტუციო ცვლილებათა პაკეტს ე.წ. ფარული მოსმენების შესახებ.

ანა მებურიშვილი