პოლიტიკა

ნაციონალური მოძრაობა რუსეთის ქმედებაზე საერთაშორისო ორგანიზაციებისადმი მიმართვის გაგზავნას გეგმავს

ნაციონალური მოძრაობა ოკუპირებულ ტერიტორიებზე რუსეთის ქმედებების საპასუხოდ საერთაშორისო ორგანიზაციებისადმი მიმართვის შემუშავების ინიციატივით გამოდის.

როგორც ბრიფინგზე პარტიის წევრმა სალომე სამადაშვილმა განაცხადა, ტექსტის შემუშავებაში ოპოზიციური პარტიები და არასამთავრობო ორგანიზაციები იქნებიან ჩართული.

ნაციონალური მოძრაობა აცხადებს, რომ რუსეთი საქართველოს ანექსიას განაგრძობს, ხელისუფლება კი არ ცდილობს ეს საკითხი საერთაშორისო თანამეგობრობის წინაშე მწვავედ დააყენოს.

„რუსეთი სრულ სამხედრო მობილიზაციას აცხადებს საქართველოსა და უკრაინის წინააღმდეგ თავდასხმითი შესაძლებლობების გასაძლიერებლად, რითაც საფრთხეს უქმნის შავი ზღვის აკვატორიაში უსაფრთხოებას. ჩვენ ვხედავთ, რომ ჩვენი ხელისუფლება,სამწუხაროდ, ამ ყველაფერზე ვერ სცემს ქმედით პასუხს. დროა, რომ რუსეთის აგრესიას ჩვენს ქვეყანასთან მიმართებაში, დაუპირისპირდეს ქართული საზოგადოება“,-აღნიშნა სამადაშვილმა.

მონიკა დავლიანიძე