პოლიტიკა

„ნაციონალური მოძრაობა“ მოქმედების საგანგებო რეჟიმზე გადადის

„ერთიანი ნაციონალური მოძრაობა“ კიევში მიხეილ სააკაშვილის დაკავებასთან დაკავშირებით მოქმედების საგანგებო რეჟიმზე გადადის.

როგორც საგანგებო ბრიფინგზე პარტიის პოლიტიკური საბჭოს თავმჯდომარემ ნიკა მელიამ აღნიშნა, პარტია მოუწოდებს საქართველოს ყველა პატრიოტს, ხვალ 14:00-ზე გამოვიდეს და მონაწილეობა მიიღოს ღირსების მანიფესტაციაში.

„რამდენიმე საათის წინ პოროშენკოს ოლიგარქიულმა დ ტოტალიტარულმა რეჟიმმა და მისმა სპეცდანიშნულების რაზმებმა დააკავეს საქართველოს პრეზიდენტი და „ერთიანი ნაციონალური მოძრაობის“ ლიდერი მიხეილ სააკაშვილი.

მიხიელ სააკაშვილის დაპატიმრება არის ივანიშვილისა და პოროშენკოს ოლიგარქიული რეჟიმების შეთანხმებული რევანში. მეტიც, მიხეილ სააკაშვილის დაპატიმრება ხდება რუსეთის ფედერაციის დაუფარავი მოთხოვნის საფუძველზე.

სწორედ ამიტომ, „ერთიანი ნაიცონალური მოძრაობა“ გადადის მოქმედების საგანგებო რეჟიმზე და აცხადებს გადამწყვეტ ბრძოლას საქართველოსთვის და მოუწოდებს ყველა საქართველოს პატრიოტს, უკლებლივ ყველა საქართველოს მოქალაქეს, ვისთვისაც ძვირფასია საქართველოს თავისუფლების იდეალები, გამოვიდეს ხვალ 14:00-ზე, რუსთაველის მეტროსთან და მონაწილეობა მიიღოს ღირსების მანიფესტაციაში. გამოწვევა მიღებულია, წინ გამარჯვებისკენ“,-განაცხადა ნიკა მელიამ.

მონიკა დავლიანიძე