პოლიტიკა

ნაციონალური მოძრაობა გიორგი მღებრიშვილის, ვახტანგ გომელაურისა და ალექსანდრე ჯეჯელავას თანამდებობებიდან გადაყენებას მოითხოვს

"ერთიანი ნაციონალური მოძრაობა" მოუწოდებს საქართველოს პრემიერ-მინისტრს, აზერბაიჯანელი ჟურნალისტის, აფგან მუხთარლის საქმეზე შს მინისტრი გიორგი მღებრიშვილი, სუს-ის ხელმძღვანელი ვახტანგ გომელაური და განათლების მინისტრი ალექსანდრე ჯეჯელავა დაკავებული თანამდებობიდან გადააყენოს.

ოპოზიციური პარტიის მოთხოვნა ჟურნალისტებს ნაციონალური მოძრაობის წევრმა ნიკა რურუამ გააცნო.
მისი თქმით, დასახელებული პირები თანამდებობებს არ დატოვებენ, ან მათ პრემიერი არ გაათავისუფლებს, ნაციონალური მოძრაობა "მიაღწევს მთავრობის მთელი შემადგენლობის გადადგომას ქართველ ხალხთან ერთად".

"აზერბაიჯანელი ჟურნალისტის, აფგან მუხთარლის მოტაცება, როგორ ეს ამერიკის შეერთებული შტატების სახელმწიფო დეპარტამენტმა და ევროპის კავშირმა შეაფასა, ყოველ მიზეზს გარეშე, კონკრეტული პირების მიერ საკუთარ თავზე პირადი პასუხისმგებლობის აღებას მოითხოვს.

ეს და ყველა მსგავსი სამარცხვინო და დანაშაულებრივი ფაქტი ყველანაირ პერსპექტივას უსპობს ჩვენს ქვეყანას, საერთაშორისო არენაზე საქართველოს პოზიციებს აზიანებს. შესაბამისად, აუცილებლად მიგვაჩნია, რომ ხელისუფლებამ ადეკვატური რეაგირება მოახდინოს, რასაც ის დღემდე შეგნებულად არ აკეთებს.

მოვუწოდებთ პრემიერ-მინისტრს, გადააყენოს დაკავებული თანამდებობებიდან შს მინისტრი გიორგი მღებრიშვილი, სუს-ის უფროსი ვახტანგ გომელაური და ვიცე-პრემიერი ალექსანდრე ჯეჯელავა, ვინც მთელი ამ პროცესის განმავლობაში უტიფარი დეზინფორმაციის კამპანიას აწარმოებს ქართული საზოგადოების თვალის ასახვევად და მოსატყუებლად.

თუ დასახელებული პასუხისმგებელი პირები არ გადადგებიან, ამ მათ პრემიერი არ გაათავისუფლებს, მაშინ ჩვენ მივაღწევთ მთავრობის მთელი შემადგენლობის გადადგომას ჩვენს მთავარ თანამებრძოლ ქართველ ხალხთან ერთად" , - განაცხადა ნიკა რურუამ.

ნინო ექვთიმიშვილი