პოლიტიკა

ნაციონალური მოძრაობა გიორგი მღებრიშვილის გადადგომას ითხოვს

ნაციონალური მოძრაობის წევრის თინა ბოკუჩავას თქმით, გიორგი მღებრიშვილისა და რუსი პრანკერების სატელეფონო საუბარს, რომელსაც რუსული და უკრაინული მედია ავრცელებს, ექსპერტიზა უნდა ჩაუტარდეს.

როგორც ბოკუჩავამ მედიას განუცხადა, იმ შემთხვევაში, თუ დადასტურდება საუბრის ავთენტურობა, ქვეყნის შს მინისტრი უნდა გადადგეს და შეწყდეს მიხეილ სააკაშვილზე სისხლის სამართლებრივი დევნა.
„ალექსნადრე ჭიკაიძე საბურავებს ეძებდა ჩვენს სარდაფებში და ამ მოტივით კითხავდნენ, მათ შორის ჩვენს პარლამენტის წევრებს, ატარებდნენ ექსპერტიზებს. ეს თეა წულუკიანისთვის, მდინარაძისთვის თუ ივანიშვილის გუნდის სხვა წევრებისთვის სერიოზული საქმე იყო.

შს მინისტრი პირდაპირ ადასტურებს, რომ მიხეილ სააკაშვილის წინააღმდეგ მიმდინარეობს პოლიტიკური დევნა, ეს არ არის მათთვის სერიოზული საკითხი. ვფიქრობ, ნათელია საზოგადოებისთვის, რა დონის არაპროფესიონალიზმთან გვაქვს საქმე“, -განაცხადა თინა ბოკუჩავამ.

რუსი პრანკერების მტკიცებით, მათ საქართველოს შინაგან საქმეთა მინისტრს გიორგი მღებრიშვილს უკრაინელი კოლეგის არსენ ავაკოვის სახელით დაურეკეს. „ვოვანი“ და „ლექსუსი“ რუსულ მედიასთან საუბარში ყვებიან, თითქოს მღებრიშვილს მიხეილ სააკაშვილის ექსტრადირება შესთავაზეს. პასუხად მღებრიშვილმა საქართველოს ყოფილი პრეზიდენტი უცენზუროდ მოიხსენია და თქვა, რომ საქართველოში მიხეილ სააკაშვილი არ სჭირდებათ, „დარჩეს სადაც არის, რადგან ქართულ მხარეს არ სურს მისი გმირად გადაქცევა“.