პოლიტიკა

„ნაციონალური მოძრაობა“ დაიძრა უფრო პოპულიზმისკენ, ჩვენ ამას კატეგორიულად ვემიჯნებით - გიგი უგულავა ვანო მერაბიშვილის განცხადებაზე

„ნაციონალური მოძრაობა“ დაიძრა უფრო პოპულიზმისკენ, რასაც ჩვენ კატეგორიულად ვემიჯნებით. განსხვავება ბევრია, – ამის შესახებ „ევროპული საქართველოს” ერთ-ერთმა ლიდერმა გიგი უგულავამ, ყოფილი პრემიერ-მინისტრის ვანო მერაბიშვილის განცხადებას უპასუხა, რომლის მიხედვით, მას სურს „ევროპული საქართველოსა“ და „ნაციონალური მოძრაობის“ გაერთიანება.

„ვანო ჩემი დიდი ხნის მეგობარია. ჩვენი მეგობრობა არ დაწყებულა პოლიტიკით. ბუნებრივია, პატივს ვცემ მის აზრს. გუშინდელმა ჩანაწერებმა დაადასტურა ის ფაქტი, რომ მის მიმართ ძალადობა განხორციელდა, ძალით იქნა გაყვანილი და ის, რაც ჩვენ ვიცოდით, კიდევ ერთხელ დადასტურდა.

რაც შეეხება პარტიებს, ჩვენ გავიყავით არა პირადი დაპირისპირების ან ემოციის გამო, რადგან ფუნდამენტურ საკითხებში არის ფუნდამენტური განსხვავება, რაც დღეს უკვე კარგად ჩანს. მაგალითად, „ნაციონალური მოძრაობა“ დაიძრა უფრო პოპულიზმისკენ, საუბრობს ისეთ თემებზე, რომელიც არარიალიზებადია და პოპულისტურ ხასიათს ატარებს. ჩვენ ამას კატეგორიულად ვემიჯნებით.

„ევროპული საქართველო“ არ არის პოპულისტური პარტია, ჩვენ ვსაუბრობთ იმაზე, რაც რეალისტურად გასაკეთებელია, იმისთვის, რომ ქვეყნის ეკონომიკა დაიძრას და სამუშაო ადგილები შეიქმნას. განსხვავება ბევრია, მაგრამ ყველა პარტიასთან საერთო ამოცანა გვაქვს ის, რომ არჩევნების გზით გავისტუმროთ „ქართული ოცნება“ ხელისუფლებისგან“,- განაცხადა უგულავამ.

„რუსთავი 2“-თან სატელეფონო ინტერვიუში შინაგან საქმეთა ყოფილმა მინისტრმა განაცხადა, რომ „მინდა და ყველაფერს გავაკეთებ, რომ „ევროპული საქართველო“ და „ნაციონალური მოძრაობა“ იყოს ერთიანი“.
კითხვაზე, როგორ უყურებს ის პარტიის გაყოფას და რომელი პოლიტიკური ძალის შეხედულებებს იზიარებს, მერაბიშვილმა უპასუხა, რომ მისთვის ორივე პარტიაში არიან მეგობრები და მიზანია, რომ ეს ძალები საერთო მიზნის მისაღწევად კვლავ გაერთიანდნენ.