პოლიტიკა

„ნაციონალური მოძრაობა“ და მისი სატელიტები კანონგარეშე მოქმედებენ, არსებობს საფუძველი, რომ საკონსტიტუციო სარჩელი იყოს შეტანილი და სასამართლომ გადაწყვეტილება მიიღოს - არჩილ გორდულაძე

„ნაციონალური მოძრაობა“ და მისი სატელიტები კანონგარეშე მოქმედებენ. ყველანაირი საფუძველი არსებობს, რომ საკონსტიტუციო სარჩელი იყოს შეტანილი და საკონსტიტუციო სასამართლომ ობიექტური გადაწყვეტილება მიიღოს, – ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ განაცხადა.

„ეს პარტიები და ეს ადამიანები კანონგარეშე მოქმედებენ და ყველანაირი საფუძველი არსებობს, რომ საკონსტიტუციო სარჩელი იყოს შეტანილი და საკონსტიტუციო სასამართლომ ობიექტური გადაწყვეტილება მიიღოს. დროებითი საგამოძიებო კომისიის მუშაობის შედეგად უკვე გამოკვეთილია ფაქტობრივი გარემოებები, რაც სარჩელის შეტანის საფუძველს ქმნის. ამავე დროს დაველოდებით, რომ კომისიამ საქმიანობა დაასრულოს. ერთ-ერთი საფუძველი იქნება პროკურატურაში მიმდინარე გამოძიებაც და თუ გამოკვეთილი იქნება მათ მიერ ჩადენილი მძიმე დანაშაულები, ეს კიდევ ერთი საფუძველი იქნება იმის, რომ საქართველოს მტრული პარტიების საქმიანობა აკრძალული იყოს. არავის ექნება თვალთმაქცობის შესაძლებლობა, რომ პარტიები დააფუძნოს და „ნაცმოძრაობა 2“ ან სამი გახდეს ჩვენს პოლიტიკურ სივრცეში. ამიტომ ამ მიმართულებითაც მომზადებულია ცვლილებები კანონმდებლობაში“, – განაცხადა არჩილ გორდულაძემ.

კითხვაზე, კონკრეტულად ვინ იგულისხმება „ნაცმოძრაობის“ სატელიტებში, არჩილ გორდულაძე პასუხობს, რომ ამაში ყველა ის პარტია იგულისხმება, რომელიც „ნაცმოძრაობის“ განაყარია.

„ამ პარტიებს შორის განსხვავება არ არის, ისინი, რეალურად, პირდაპირ დაკავშირებული არიან „ნაცმოძრაობასთან“. მათ მოუწევთ, პასუხი აგონ სამართლებრივადაც საკონსტიტუციო სასამართლოში“, – განაცხადა არჩილ გორდულაძემ.