საზოგადოება

„ნაციონალებმა“ ივანიშვილს 1 მილიარდ დოლარამდე გადასახადები არ გადაახდევინეს - რას იხსენებს ზურაბ ადეიშვილი

იუსტიციის ყოფილი მინისტრი, ზურაბ ადეიშვილი ამბობს, რომ სახელმწიფომ ბიძინა ივანიშვილს 1 მილიარდ დოლარამდე ოდენობის გადასახადები არ გადაახდევინა. ამის შესახებ მან რუსთავი 2-ის ყოფილ გენერალურ დირექტორთან, ნიკა გვარამიასთან ინტერვიუს დროს ისაუბრა.

ზურაბ ადეიშვილმა გვარამიას შეკითხვის პასუხად თქვა, რომ ბიძინა ივანიშვილის ქონება 2003 წლიდან 2007 წლამდე დრამატულად გაიზარდა.

"დრომაც აჩვენა, რომ ჩვენი დამოკიდებულება [ბიძინა ივანიშვილის] მიმართ იყო აბსოლუტურად ნაივური, არასწორი და, პრინციპში, არასახელმწიფოებრივიც. ადამიანი, რომელიც ცხოვრობს საქართველოში, არის საქართველოს მოქალაქე ან რეზიდენტი, ის ვალდებულია გადაიხადოს გადასახადები საქართველოში. ადამიანი, რომლის შემოსავალიც ყოველწლიურად, და ვიცით ჩვენ იმ პერიოდის განმავლობაში უცხოეთში რაღაც აქტივებს ჰყიდდა, 2009 წლამდე ეკუთვნოდა გადასახადების გადახდა... ჩვენ არ ვიცით, რამდენი აქტივი გაასხვისა იმ პერიოდის განმავლობაში და რა შემოსავალი მიიღო, მაგრამ ნამდვილად ვიცით, რომ 2003-დან 2007 წლამდე მისი ქონება დრამატულად გაიზარდა, სადღაც 7.5 მილიარდამდე, მანამდე Forbes-ში მგონი სამი თუ ოთხი მილიარდი ჰქონდა, ანუ სადღაც ლაპარაკი უნდა იყოს 1 მილიარდ დოლარზე [ამ ოდენობის გადასახადები საქართველოს სახელმწიფომ ბიძინა ივანიშვილს არ გადაახდევინა]", - თქვა ზურაბ ადეიშვილმა.