პოლიტიკა

ნატოსთან თანამშრომლობა მალე მჭიდრო ინტეგრაციაში გადაიზრდება - ირაკლი კობახიძე

თბილისში ნატოს საპარლამენტო ასამბლეის საგაზაფხულო სესია გაიხსნა.

საქართველოს პარლამენტის თავმჯდომარემ, ირაკლი კობახიძემ აღნიშნა, რომ ალიანსის დახმარებით საქართველო ძლიერდება თავდაცვისა და უსაფრთხოების კუთხით.

ამის შესახებ მან ნატოს საპარლამენტო ასამბლეის პრეზიდენტთან პაოლო ალისთან ერთობლივ პრესკონფერენციაზე განაცხადა.

კობახიძემ იმედი გამოთქვა, რომ ეს თანამშრომლობა ინტეგრაციაში გადაიზრდება.

„ჩვენ მოხარული ვართ, რომ ასამბლეის სესია ტარდება საქართველოში, იმ ქვეყანაში, რომელიც ნატოს გადაწყვეტილებით, აუცილებლად გახდება ალიანსის წევრი. ეს არის ქართველი ხალხის არჩევანი და ჩვენ ვართ მოხარული, რომ მას მხარს უჭერს ჩრდილოატლანტიკური ალიანსი, რომელიც ჩვენი მეგობარი ქვეყნებისგან შედგება.

ნატო და საქართველო უკვე დიდი ხანია მხარდამხარ იბრძვიან გლობალური უსაფრთხოებისა და მშვიდობისთვის და ალიანსთან ურთიერთობას უკვე მოაქვს კონკრეტული შედეგები საქართველოსთვის.

ნატოს ხელშეწყობით ძლიერდება ჩვენი თავდაცვა, უსაფრთხოება და ჩვენ იმედს გამოვთქვამთ, რომ ჩვენი პრაქტიკული თანამშრომლობა მალე მჭიდრო ინტეგრაციაში გადაიზრდება“, - განაცხადა კობახიძემ.

ანა მებურიშვილი