პოლიტიკა

ნატოსადმი სკეპტიკურად განწყობილი ადამიანები არ უნდა ჩავთვალოთ პრორუსულებად - პრეზიდენტი

დღეს საქართველოს პრეზიდენტმა გიორგი მარგველაშვილმა თბილისში ნატო-საქართველოს სახალხო დიპლომატიის ფორუმის მეორე დღე გახსნა.

პრეზიდენტმა ძირითადად ისაუბრა საქართველოს ევროატლანტიკურ სტრუქტურებში ინტეგრაციის პროცესზე, საქართველოს საგარეო პოლიტიკის პრიორიტეტებზე, დიპლომატიურ პროცესებში სახალხო დიპლომატიის როლსა და რუსეთ-საქართველოს ურთიერთობებზე.

პრეზიდენტმა აღნიშნა, რომ ევროატლანტიკური ალიანსისადმი სკეპტიციზმი რამდენიმე მიზეზით შეიძლება იყოს ახსნილი. ერთ-ერთი მათგანია რუსული პროპაგანდა.

„სკეპტიციზმი, ერთი მხრივ, განპირობებულია იმით, რომ ჩვენ ყველა მოველოდით უფრო სწრაფ პროცესსა და იყო აწეული თამასა. მეორე მხრივ, თვითონ ნატოს გაერთიანებისა და მდგრადობის ნაწილში კითხვები ისმება საერთაშორისო მედიაში, თუ რამდენად ძლიერია ალიანსი ამ ეტაპზე, იმ გამოწვევის წინაშე, რომელიც რუსეთისგან მოდის. მესამე არის ამაზე დაფუძნებული რუსული პროპაგანდა, რომელიც მთელ ამ სირთულეებს აზვიადებს და აქცევს სკეპტიციზმად. ეს არის ის რეალობა, რომელიც საზოგადოების გარკვეულ ნაწილს გააჩნია“, - განაცხადა პრეზიდენტმა ფორუმზე კითხვა-პასუხის დროს.

მისი თქმით, გასათვალისწინებელია აღმოსავლეთ ევროპის ქვეყნების, განსაკუტრებით ბალტიისპირეთის ქვეყნების გზა ნატომდე. პრეზიდენტის განცხადებით, „ბალტიისპირელი მეგობრები მუდმივად გვიზიარებდნენ თავიანთ სირთულეებს“.

მარგველაშვილის შეფასებით, ნატოსადმი სკეპტიკურად განწყობილი ადამიანი არ ნიშნავს პრორუსულს.

„არ უნდა ჩავთვალოთ, რომ ეს ადამიანები არიან პრორუსულები. სკეპტიციზმს გააჩნია თავისი ობიექტური საფუძველი, მაგრამ მიზნის მიღწევას სჭირდება მდგრადობა და ამ მდგრადობის მაგალითი უკვე არსებობს”, - განაცხადა პრეზიდენტმა.

ანა მებურიშვილი