პოლიტიკა

ნატო-ს წევრი ექვსი სახელმწიფო მზად არის, შავი ზღვის რეგიონში სახმელეთო, საჰაერო და საზღვაო ძალები გაგზავნოს - იენს სტოლტენბერგი

შავი ზღვის რეგიონში ნატო-ს კონტინგენტის გაძლიერებაზე საბოლოო შეთანხმება მიღწეულია. შესაბამისი განცხადება ნატო-ს გენერალურმა მდივანმა, იენს სტოლტენბერგმა ბრიუსელში გააკეთა, სადაც ნატო-ს წევრი ქვეყნების თავდაცვის მინისტრების შეხვედრა გაიმართა.

მისი ინფორმაციით, შეხვედრაზე გადაწყდა, რომ 6 ქვეყნის მონაწილეობით, გაიზრდება სახმელეთო, საჰაერო და საზღვაო ძალების კონტინგენტი.

„ჩვენი ძალები ნამდვილად მრავალეროვნული იქნება. ვაგზავნით მკაფიო მესიჯს. ნატო დგას როგორც ერთი ორგანიზაცია და ნებისმიერ ჩვენს მოკავშირეზე თავდასხმა ჩაითვლება ყველა ჩვენგანზე თავდასხმად. ალიანსი აკეთებს იმას, რასაც ამბობს. ჩვენ ვასრულებთ დაპირებებს. დღეს განვიხილეთ შავი ზღვის რეგიონში ნატო-ს ყოფნის გაძლიერების პროგრესი. მრავალეროვნული ბრიგადა რუმინელების ხელმძღვანელობით ხმელეთზე განთავსდება. ვმუშაობთ საჰაერო და საზღვაო ზომების დახვეწაზე. მოხარული ვარ, რომ რამდენიმე ქვეყანამ გამოთქვა სურვილი წვლილი შეიტანოს შავი ზღვის რეგიონში ალიანსის ყოფნის გაძლიერებაში. მათ შორის არიან: შეერთებული შტატები, კანადა, ჰოლანდია, გერმანია, პოლონეთი და თურქეთი,“-განაცხადა სტოლტენბერგმა.

მისივე თქმით, თავდაცვის მინისტერიალის განხილვის ერთ-ერთ მთავარ თემად კვლავ რუსეთი და მისგან მოსალოდნელი საფრთხეები რჩება.

„შეხვედრაზე ასევე განვიხილეთ ნატო-ს საზღვრებთან სამხედრო აქტიურობის თემა, მათ შორის რუსეთის სწავლებები, კავკასია 2016 და სარაკეტო სისტემების "ისკანდერების" განლაგება კალინინგრადში. ჩვენ ვნახეთ, რომ რუსეთი ახდენს სამხედრო შესაძლებლობების მოდერნიზებას და რაც მთავარია ვნახეთ, რომ მას აქვს სურვილი გამოიყენოს სამხედრო ძალა მეზობლების ყირიმის, უკრაინის და საქართველოს წინააღმდეგ, ასევე მოვისმინეთ რუსეთის მხრიდან მუქარის რიტორიკაც. ასე რომ ნატო-მ უნდა მოახდინოს რეაგირება და სანდო შემაკავებელი მექანიზმი შეიმუშავოს უსაფრთხოების კუთხით ახალი გარმოსთვის. ნატო არ არის ძლიერი იმისთვის, რომ კონფლიქტის პროვოცირება მოახდინოს, ნატო ძლიერია, რადგან ჩვენ გვსურს კონფლიქტის აღკვეთა,“-განაცხადა ნატო-ს გენერალურმა მდივანმა, რომლის ციტატის თარგმანსაც რუსთავი 2 ავრცელებს.

ნინო ექვთიმიშვილი