პოლიტიკა

ნატო ჩხეიძემ დეპუტატის უფლებამოსილების შეწყვეტამდე დარიცხული ხელფასით გაჭირვებულ ოჯახებს საახალწლო ნობათები გადასცა

მოძრაობა „სახელმწიფო ხალხისთვის“ პოლიტიკური ლიდერის, გაერთიანებული ოპოზიციის წევრის, ნატო ჩხეიძის განცხადებით, დეკემბრის თვეში, როგორც მოქმედ დეპუტატს, ხელფასი დაერიცხა, რომლითაც ხაშურ - ქარელ - გორის სოფლების გაჭირვებულ ოჯახებს საახალწლო ნობათები გადასცა.

„ოცნების ხელისუფლების მუქარის მიუხედავად მაინც ჩარიცხული სადეპუტატო ხელფასი სად უნდა წამეღო, თუ არა ხაშურ- ქარელ- გორის სოფლებში.

სატივე, აგარა, კეხიჯვარი, შინდისი, საქაშეთი, დღეს ჩემს შტაბთან ერთად კიდევ ერთხელ მოვიარე, კიდევ შევხვდი ჩემს ქართლელებს, ნაღვლიანთვალებიან და მხნეგულიან ადამიანებს.

პარლამენტის წევრი ვარ და არა ვარ. მათი დეპუტატი ვარ და არა ვარ. მათი მაინც ყოველთვის ვარ, ჩემიანები მაინც ყოველთვის არიან.

რვა ოჯახი მოვიარე, ერთგან კი რას ვხედავ, - კედელზე ჩემი საარჩევნო ბუკლეტიდან ამოჭრილი ფოტო აქვს გაკრული, “ შევხედავ და იმედი მეძლევა, ნატო, შვილო”, მეუბნება ობლების ბებო.

მე ვერ ვარ მათი დეპუტატი და მაინც ჩემი იმედი აქვს.... შეიძლება გული გაგიჩერდეს ერთდროულად სიხარულისა და პასუხისმგებლობისგან.

შევხვდით, მოვეფერეთ ერთმანეთს, გავამხნევეთ, ვიტირეთ, ვიცინეთ, ახალი წელი მივულოცეთ და სასიკეთო მომავლის მალე დადგომა ვუსურვეთ ერთმანეთს.

ჩვენი სურვილი წრფელია. ჩვენი ცრემლი ანკარაა. ჩვენი ღიმილი იმედიანია. ერთად ვართ და ერთმანეთს გავიტანთ. კაცი კაცითაო, ნათქვამია.

მადლიბა ჩემი შტაბის წევრებს - მაკა ჯაფარიძეს, მაია ახვლედიანს, მაკა ჯანაშიას,
აგრეთვე- როინ მახარობლიძეს, ილია ბურჯანაძეს, ბათუ ქორჩილავას დღევანდელი დღის ორგანიზებისათვის,“ - წერს ნატო ჩხეიძე სოციალურ ქსელში.

შეგახსენებთ, 31 ოქტიმბრის არჩევნებს სრულიად ოპოზიცია გაყალბებულად თვლის.

ნატო ჩხეიძემ საპარლამენტო მანდატზე უარი ოფიციალურად განაცხადა.