პოლიტიკა

ნატო ჩხეიძე: ნეტავ ბ- ნი შოთაძის პროექტი რა ვითარებაშია გამქრალი, არ არის საინტერესო?

პარლამენტის დამოუკიდებელი დეპუტატი ნატო ჩხეიძე, საპროკურორო საბჭოში ირაკლი შოთაძის გასაუბრების პროცესს სოციალური ქსელით ეხმიანება.

„ სერიიდან: პროექტები და მათი ფრიი...ფრიი...

ბ - მა შოთაძემ ბრძანა, პროექტის დასაფინანსებლად შევხვდი ბიძინა ივანიშვილსო, მაგიტომ მივედიო მის ბიზნეს ცენტრშიო, (ამავდროულად საცხოვრებელი სახლი რომ არის) და იქ სხვებიც რომ დამხვდნენ, გამიკვირდა და ჩუმად ვიყავიო.

საგანმანათლებლო პროექტი იყოო ის პროექტიო.
და,
სავარაუდოა, რომ გამართული და დასრულებული უნდა ყოფილიყო, რადგან დაფინანსებაღა კლებია.

და სად არის ის პროექტი?

მაშ, გაასაჯაროოს პროექტი ბ- მა შოთაძემ.

მე თუ მკითხავთ, არსადაც არ არის საგანმანათლებლო პროექტი.

არ არსებობს და იმიტომ.

გაგახსენდებოდათ, ჩემი არ იყოს, ოქუაშვილი იმიტომ იყო ჩემთანო, ივანიშვილმა რომ აგვიხსნა, რომ ჩხარტიშვილს და ოქუაშვილს პროექტი ჰქონდა თამბაქოს შესახებო და მე უნდა დამეფინანსებინა 4 მილიონადო.

მერე რომ მოჰკითხეს, სად არის ის პროექტიო, ასე ახსნეს, ოქუაშვილმა წაიღო და ფილიპ მორისს მიჰყიდაო.

აბაა, ერთადერთი ცალი პროექტი ჰქონიათ და ისიც გამქრალა ქვეყნიდან.

ნეტავ ბ- ნი შოთაძის პროექტი რა ვითარებაშია გამქრალი, არ არის საინტერესო?

საინტერესოა!..“ - წერს ნატო ჩხეიძე.

ცნობისთვის: გენერალური პროკურორობის კანდიდატმა ირაკლი შოთაძემ საპროკურორო საბჭოზე მოსმენისას დაადასტურა, რომ ბიძინა ივანიშვილსა და მამუკა ხაზარაძეს შორის გამართულ შეხვედრას ესწრებოდა, სადაც ვანო ჩხარტიშვილისა და მამუკა ხაზარაძის სამოქალაქო ბიზნეს დავაზე იყო ლაპარაკი.

„მე ვიყავი მთავარი პროკურორი და ვიყავი პირად საკითხზე ბიძინა ივანიშვილთან. ეს იყო კერძო შეხვედრა პროექტთან დაკავშირებით, რომლის განხორციელებასაც ვფიქრობდი. შესაბამისად, მე შეხვედრას არანაირი სტატუსით არ ვესწრებოდი“, - განაცხადა შოთაძემ.

მისი თქმით, ეს პროექტი პირდაპირ არ იყო კავშირში პროკურატურასთან. „საკითხი იყო დაკავშირებული იურიდიულ განათლებასთან“.
შეგახსენებთ: მამუკა ხაზარაძემ 2019 წლის 12 სექტემბერს განაცხადა, რომ ბიძინა ივანიშვილმა მას საკონსტიტუციო სასამართლოში ბიზნესმენ ვანო ჩხარტიშვილის წინააღმდეგ შეტანილი სარჩელის გამოტანა სთხოვა. ბიზნესცენტრში გამართულ შეხვედრას მთავარი პროკურორი ირაკლი შოთაძე ესწრებოდა.