პოლიტიკა

ნატო ჩხეიძე ლევან იზორიას: გარდა სიამაყისა და სიხარულისა, იქნებ გვითხრათ, რა წუხილი გაქვთ თქვენდამი რწმუნებულ სამინისტროში?

წარმატებებთან ერთად წუხილიც რომ მოგვესმინა, იქნებ ასეთი და ამდენი მწვავე შეკითხვა აღარც ყოფილიყო და თავისთავად გაეცემოდა პასუხი ბევრ საჭირბორიტო საკითხს, - ასე მიმართა პარლამენტის დამოუკიდებელმა დეპუტატმა ნატო ჩხეიძემ საქართველოს თავდაცვის მინისტრს, ლევან იზორიას.

„ბატონო ლევან, მოვისმინეთ თქვენი მოხსენება, რომელმაც ტაში დაიმსახურა ოცნების პარტიის მხრიდან და ბატონი ოხანაშვილის შეფასებით: ხელშესახები პროგრესი დაგვანახეთ. ასეთი შთაბეჭდილება დარჩება ერთი შეხედვით ყველას, ვინც მოისმენს თქვენს ფრაზებს: ...უპრეცენდენტო შედეგი; ...ამბიციური ინიციატივა; ...ყველაზე სანდო პარტნიორი; ...შთამბეჭდავი რეფორმები; ...სამაგალითო და სამოდელო ქვეყანა; ...სიამაყით უნდა გითხრათ; ...წარჩინებით შესრულდა; ...სიხარულით უნდა აღვნიშნო და ა.შ.

ბატონო ლევან, გარდა სიამაყისა და სიხარულისა, იქნებ გვითხრათ, რა წუხილი გაქვთ თქვენდამი რწმუნებულ სამინისტროში?

ბატონო მინისტრო, ჩემგან არ გესწავლებათ, მაგრამ კათედრიდან თქვენი წუხილიც რომ მოგვესმინა, იქნებ ასეთი და ამდენი მწვავე შეკითხვა აღარც ყოფილიყო და თავისთავად გაეცემოდა პასუხი ბევრ საჭირბორიტო საკითხს.

ერთი სიტყვით, თქვენი შეფასებით, საწუხარი რა არის თავდაცვის სამინისტროს საქმიანობაში, ბატონო მინისტრო?“ - მიმართა ნატო ჩხეიძემ თავდაცვის მინისტრს.