პოლიტიკა

ნატო ჩხეიძე : ეს არის ჩვენი დროის ხელისუფლების ქმედებების ლაკონური შეფასება: მგელს მგლობა ერქვა და ტურამ ქვეყანა დააქციაო

წინა კვირას დიდი მღელვარება გამოიწვია საზოგადოებაში ორმა მოვლენამ: ქართული წიგნის ეროვნული ცენტრისა და მწერალთა სახლის გაერთიანების ინიციატივამ განათლების სამინისტროს მიერ და მალხაზ მაჩალიკაშვილისთვის ტერორიზმის მცდელობის დაბრალებამ პროკურატურის მიერ, - ამის შესახებ დამოუკიდებელმა დეპუტატამა ნატო ჩხეიძემ პარლამენტის პლენარულ სხდომაზე განაცხადა.

მისი თქმით, ერთიცა და მეორეც გაუმართლებელი და არაგონივრული და არასახელმწიფოებრივი გადაწყვეტილებაა.

„საზოგადოების გამოცდა მსგავსი ექსპერიმენტებით ჩვენი მთავრობის არაკვალიფიციურობაზე მეტყველებს.

და კიდევ უფრო არწმუნებს საზოგადოებას, რომ ეს არაკვალიფიციურობა აუცილებლად შესაცვლელია.
ვფიქრობ, განათლების სამინისტროს თითქმის გადაწყვეტილებაზე, აქ, პარლამენტში გავაჟღერო მწერალ როსტომ ჩხეიძის გამოხმაურება, რადგან მწერალის ნააზრევი ყოველთვის მიუკერძოებლად და რელიეფურად აირეკლავს დროის განწყობილებებსა და ტენდენციებს.

“თუ რომელიმე ორგანიზაციას შეიძლებოდა დარქმეოდა წარმატებული ჩვენს დროში, უდავოდ ქართული წიგნის ეროვნულ ცენტრსაც.

თუ რომელიმე ორგანიზაციას უნდა ეგრძნო თანადგომა და ხელშეწყობა მთავრობისაგან, უდავოდ ქართული წიგნის ეროვნულ ცენტრსაც.

მაგრამ ეს - სახელმწიფოსათვის შესაფერის გარემოში.

ჩვენში კი, თანადგომასა და ხელშეწყობას ვინ ჩივის, ოღონდ ხელს მაინც ნუ შეუშლიდნენ.
ესეც უნდა მომხდარიყო და მომხდარიყო ყველაზე მიუღებელი ფორმით: სულაც გაეუქმებინათ.
მისი შეერთება მწერალთა სახლთან არსებითად გაუქმების ტოლფასია, რაკიღა ამ ორ დამოუკიდებელ ორგანიზაციას ერთმანეთთან საერთო არაფერი გააჩნია ზოგადკულტურული ინტერესების გარდა.
ეს არის ყოვლად მცდარი და გაუმართლებელი საზოგადოებრივ-პოლიტიკური ნაბიჯი.

თუ ექსპერიმენტია - აზრსმოკლებული ექსპერიმენტი.

და თუ შეგნებული გადაწყვეტილება - უბრალოდ ბოროტება.

თუმც... რაღა უნდა გვიკვირდეს ამ ხელისუფლების პირობებში!..

მგელს მგლობა ერქვა და... ტურამ ქვეყანა დააქციაო.”

დიახ, კოლეგებო, ვფიქრობ, სწორედ ეს არის ჩვენი დროის ხელისუფლების ქმედებების ლაკონური შეფასება: მგელს მგლობა ერქვა და ტურამ ქვეყანა დააქციაო, “ - განაცხადა ნატო ჩხეიძემ.