სამართალი

ნათია მეზვრიშვილის თქმით, საგამოძიებო კომისიის რომელი რეკომენდაცია იქნება გათვალისწინებული მას შემდეგ გაირკვევა, რაც შსს დასკვნას დეტალურად გაეცნობა

შს მინისტრის მოადგილის, ნათია მეზვრიშვილის განცხადებით, ხორავას ქუჩის საქმეზე შექმნილი საგამოძიებო კომისიის დასკვნაში მნიშვნელოვანია არა პოლიტიკური, არამედ სამართლებრივი შეფასებები. მისივე თქმით, თუკი შეფასებები იქნება არგუმენტირებული, იქნება განხილული მათი შესრულების საკითხიც.

მეზვრიშვილის განმარტებით, ის, თუ რომელ რეკომენდაციას გაითვალისწინებს შსს მას შემდეგ გაირკვევა, რაც უწყება კომისიის მიერ მომზადებულ დასკვნას დეტალურად გაეცნობა.

რაც შეეხება ამავე დასკვნაში მოყვანილ რეკომენდაციას საქმის გამომძიებლის, ირაკლი ფიფიას მიერ საქმის ერთ-ერთი ფიგურანტის მ.კ-სთვის ხელის დაფარების თემაზე გამოძიების დაწყებას, მეზვრიშვილმა განაცხადა, რომ ამ საკითხზე საკმარისი არგუმენტები და მტკიცებულებები არ არსებობს.

„ჩემთვის არ არის საკმარისი და დასაბუთებული არგუმენტები გამომძიებელთან დაკავშირებით, მით უმეტეს გაუგებარია, რატომ ხდება აქცენტის აღება ფიფიაზე. სამართლებრივი არგუმენტაცია თუ იქნება, ამაზე შსს, ბუნებრივია, რეაგირებას მოახდენს და თუ არგუმენტი მხოლოდ ის არის ფიფიასთან დაკავშირებით, რომ მირზა სუბელიანთან, როგორც ეს კომისიაზე ითქვა, მან არაერთი ზარი განახორციელა, ეს არ არის არგუმენტი და არასერიოზულია. ამაზე ბუნებრივია, შსს რეაგირებას არ მოახდენს“, - განაცხადა მეზვრიშვილმა.