პოლიტიკა

ნარკოპოლიტიკის ლიბერალიზაციის შესახებ კანონპროექტზე მსჯელობა უნდა შეჩერდეს - გიგა ბუკია

„ქართული ოცნების“ ფრაქცია „კონსერვატორების“ თავმჯდომარის, გიგა ბუკიას განცხადებით, საკანონმდებლო ინიციატივა ნარკოპოლიტიკის ლიბერალიზაციის შესახებ არ უნდა განიხილებოდეს პარლამენტში, არამედ უნდა იყოს გაწვეული.

როგორც მან პირველ არხს განუცხადა, კანონპროექტის მიღება ნარკოტიკების მოხმარების მკვეთრ ზრდას გამოიწვევს. ბუკიას ინფორმაციით, ინიციატივამ „ქართულ ოცნებაში“ აზრთა სხვადასხვაობა გამოიწვია და სიტუაცია იქამდე მივიდა, რომ უმრავლესობის 7-მა დეპუტატმა ჯანდაცვის კომიტეტის 27 დეკემბრის სხდომას ბოიკოტი გამოუცხადა.

„იმ ინიციატივასთან დაკავშირებით ბევრი შენიშვნა გვქონდა, რომელიც უმრავლესობის გარკვეულმა წევრებმა წარმოადგინეს. აღნიშნული ინიციატივა ძალიან დიდ საფრთხეებს შეიცავს, რომ ნარკოტიკების მოხმარება მკვეთრად გაიზრდება. ეს კანონპროექტი ინიცირებულიც კი არ უნდა ყოფილიყო, არათუ, მასზე მსჯელობა შეჩერდეს. იმ პოზიციას ვეთანხმებით, რომ პარლამენტში კანონპროექტი ამ ფორმით განხილული არ უნდა იყოს. ამ ფორმით კანონპროექტის ინიცირების წინააღმდეგი ვიყავით, ვინაიდან სურვილი გვქონდა, რომ შიდა აზრთა სხვადასხვაობა გარეთ არ გამოსულიყო, თუმცა აკაკი ზოიძემ ეს კანონპროექტი ამ ფორმით შემოგვთავაზა და ნახეთ, რომ წინააღმდეგები არა მხოლოდ „კონსერვატორები“ ვართ, არამედ კვორუმი თავად იმ კომიტეტშიც კი არ შედგა, რომლის ხელმძღვანელი აკაკი ზოიძეა. სხდომას უმრავლესობა არ დაესწრო და აკაკი ზოიძე იძულებული გახდა, კომიტეტი „ნაციონალების“, „ევრონაცებისა“ და ოპოზიციის ხმებით შეეკრიბა და ინციატივა ასე განეხილა“, – თქვა ბუკიამ.

დეპუტატის შეფასებით, ეს ინიციატივა კანონად არ გადაიქცევა.

„ინტერესი დიდია, რომ ამ პრობლემის გადაჭრის პროცესში ბევრი ადამიანი ჩაერთოს და პრობლემის გადაჭრის გზები მოიძებნოს. მისასალმებელია, თუ კანონპროექტი გაწვეული იქნება და გადაწყვეტილება უფრო ფართო კონსენსუსის შედეგად იქნება მიღებული და არა ისე, როგორც დღეს არის ინიცირებული. ამ კანონპროექტს „კონსერვატორების“ მხარდაჭერა არცერთ შემთვევაში არ ექნება. თუ ეს კანონპროექტი ამ ფორმით განიხილება, დიდი ალბათობით, კანონად ვერ იქცევა“ – აღნიშნა ბუკიამ.

დეპუტატის თქმით, ის იზიარებს საპატრიარქოს განცხადებას ამ კანონპროექტზე.

ჯანდაცვის კომიტეტმა ნარკოპოლიტიკის ლიბერალიზაციის შესახებ კანონპროექტი პირველი მოსმენით 2017 წლის 27 დეკემბერს მიიღო. ამ საკანონმდებლო პაკეტის ინიცირება გასული წლის გაზაფხულზე მოხდა, თუმცა მასზე მსჯელობა შემოდგომიდან დაიწყო.

კანონპროექტს საპატრიარქოც გამოეხმაურა. გუშინ გამოქვეყნებულ განცხადებაში ის გამოვიდა ინიციატივით, რომ ნარკოპოლიტიკის შესახებ საზოგადოებრივი განხილვა გაიმართოს, რომელშიც მონაწილეობას მიიღებენ ხელისუფლების წარმომადგენლები, ფსიქოლოგები, ექიმები, იურისტები, სასულიერო პირები, ადამიანის უფლებადამცველები, ჟურნალისტები, პედაგოგები, ინტელიგენცია და სამართალდამცველები.

ანა მებურიშვილი