პოლიტიკა

ნარკოპოლიტიკის ლიბერალიზაციაზე ცვლილებების ინიცირება უახლოეს პერიოდში მოხდება - არჩილ თალაკვაძე

საპარლამენტო უმრავლესობის წევრის, არჩილ თალაკვაძის განცხადებით, ნარკოპოლიტიკის ლიბერალიზაციაზე საკანონმდებლო ცვლილებების ინიცირება უახლოეს მომავალში მოხდება.

როგორც დეპუტატმა 1tv.ge-ის უთხრა, ცვლილებები ითვალისწინებს ისეთ მომსახურებაზე ხელმწისაწვდომობას, როგორიცაა ნარკოდამოკიდებულებისგან ზიანის შემცირება და რეაბილიტაცია.

„ჩვენ ნარკოპოლიტიკას ვემხრობით და ცვლილებაზე ვმუშაობთ, რომელიც პრევენციის მიზნით, ახალ თაობას ნარკოდამოკიდებულებისგან იცავს, რომელიც ითვალისწინებს მომხმარებელთა ინტერესების დაცვასა და მათ ხელმისაწვდომობას ისეთ სერვისებზე, როგორიცაა ზიანის შემცირებისა და რეაბილიტაციის სერვისები. ასევე, ეს მიდგომა არანაირ კომპრომისს არ უშვებს ნარკოტიკებით ვაჭრობასთან და ორგანიზებულ ნარკოდანაშაულთან მიმართებაში. ამ რეფორმის განხორციელება შესაძლებელი ჩვენი ხელისუფლების პირობებში გახდა და ამ წლებში, არაერთი მნიშვნელოვანი ნაბიჯი გადაიდგა.

მიმდინარე წლის განმავლობაში, საკანონმდებლო ცვლილებების მიღებას აუცილებლად უზრუნველვყოფთ. ცვლილებების ინიცირება უახლოეს პერიოდში მოხდება“,- განცხადა თალაკვაძემ.

შეგახსენებთ, შაბათს საქართველოს პრემიერ-მინისტრმა გიორგი კვირიკაშვილმა მიმართა პარლამენტს, რომ დაჩქარებული წესით იყოს მიღებული კანონპროექტი ნარკოპოლიტიკის ლიბერალიზაციის შესახებ.

ანა მებურიშვილი