პოლიტიკა

ნარკოპოლიტიკა უნდა გადაიხედოს, მაგრამ არა იმ სახით, რომელიც საზოგადოების ნაწილში არის გავრცელებული - დავით სერგეენკო

ჯანდაცვის მინისტრის, დავით სერგეენკოს შეფასებით, არსებული ნარკოპოლიტიკა უნდა გადაიხედოს, თუმცა ეს არ უნდა ნიშნავდეს ყველა ნარკოტიკული საშუალების ლიბერალიზაციასა და დეკრიმინალიზაციას, არამედ ზიანის შემცირებას.

„ნარკოპოლიტიკა, რა თქმა უნდა, უნდა გადაიხედოს, მაგრამ არა იმ სახით, რომელიც საზოგადოების ნაწილში არის გავრცელებული, რომ უკლებლივ ყველა ნარკოტიკული საშუალების დეკრიმინალიზაცია და ლიბერალიზაცია უნდა მოხდეს. ნარკოპოლიტიკის გადახედვა ნიშნავს, რომ შემცირდეს მიწოდება და შემცირდეს მოთხოვნა, ანუ ზიანი. ეს არის დედააზრი. უკვე იყო რამდენიმე ნაბიჯი, მათ შორის საკონსტიტუციო სასამართლოს გადაწყვეტილებები მარიხუანასთან დაკავშირებით, ახლა უკვე ფინალურ სტადიაში არის ახალი კანონპროექტი, რომელიც, იმედია, იმ სახით ამოქმედდება, რომ მთავარი ამოცანა შეამციროს, მიწოდების და მოთხოვნის შემცირება“, - უპასუხა მინისტრმა შეკითხვას, რომელიც ეხებოდა ბოლო დროს გავრცელებულ ინფორმაციას ახალგაზრდების შესაძლო ნარკოტიკული ინტოქსიკაციის შესახებ.