პოლიტიკა

ნანგრევებში თქვენც მოყვებით, ვინც ხმა ნაციონალური მოძრაობის ჯინაზე მიეცით ქვეყნის დაქცევას - აკაკი ბობოხიძე

ბატონებო, ის რაც თქვენთვის და ჩემთვისაც არის ფასის უმნიშვნელო მატება, რიგითი ადამიანებისთვის არის სიკვდილ-სიცოცხლის საკითხი, - მიმართა დეპუტატებს პლენარულ სხდომაზე საპარლამენტო უმცირესობის წევრმა აკაკი ბობოხიძემ ქვეყანაში არსებულ სოციალურ-ეკონომიკურ მდგომარეობაზე საუბრისას.

,,თითქოს ზრუნავთ ადამიანებზე, რომ სიგარეტი არ მოწიონ და ეს არის ბატონებო, ცინიკური, იმიტომ, რომ ადამიანები ამის გამო სამწუხაროდ, სიგარეტის მოწევას თავს არ დაანებებენ. უბრალოდ, იძულებული გახდებიან, უფრო იაფასიან ან უფრო მდარე ხარისხის თამბაქოზე გადავიდნენ, რაც კიდევ უფრო დააზიანებს მათ ჯანმრთელობას. ადამიანები იმის მაგივრად, რომ იყიდონ ვთქვათ, 2010 წლის მანქანა, უკვე იძულებული გახდებიან იყიდონ 2005 წლის მანქანა, ანუ უფრო ძველი მანქანა, რომელიც ასევე დააზიანებს გარემოს და ასევე დააზიანებს ადამიანების ჯანმრთელობას.

ადამიანები ნავთობპროდუქტებზე ფასების გაზრდის შემდგომ იძულებული გახდებიან ჩაასხან არა მაღალი ხარისხის ბენზინი, არამედ დაბალი ხარისხის ბენზინი ფასის გამო, რომელიც ასევე დააზიანებს გარემოს და დააზიანებს იმ ადამიანებს ვიზედაც, ვითომცდა თქვენ ზრუნავთ.

განსაკუთრებით ცინიკური იყო რამდენიმე თანამდებობის პირის განცხადება, მათ შორის ვიცე-სპიკერის, რომლის შემოსავლები, თუ საწვავსაც ჩავთვლით რაც მასზე იხარჯება, შეიძლება 7 ათას ლარამდეც კი ადის, რომ თურმე ფასები მხოლოდ უმნიშვნელოდ მოიმატებს.

ბატონებო ის, რაც თქვენთვის და მათ შორის ჩემთვისაც არის უმნიშვნელო მატება, რიგითი ადამიანებისთვის არის სიკვდილ-სიცოცხლის საკითხი. ეს პრობლემები თქვენთვის არის უმნიშვნელო და არა რიგითი ადამიანებისთვის და არა პენსიონერებისთვის’’, - განაცხადა აკაკი ბობოხიძემ.
დეპუტატი არსებულ ვითარებაზე პასუხიმსგებლობას იმ ამომრჩეველს აკისრებს, ვინც არჩევნებში ,,ქართულ ოცნებას’’ დაუჭირა მხარი ,,ნაციონალური მოძრაობის’’ ჯინაზე.

,,აბსოლუტურად ვეთანხმები, ბატონ დიმიტრი ქუმსიშვილს, რომელიც ამბობს, რომ ეს არის ჩვენი პოლიტიკური პასუხისმგებლობის საკითხი. თქვენ არანაირი პროგრამა და არანაირი ვალდებულება რეალურად ხალხის წინაშე არ აგიღიათ, ამიტომ, მე მინდა ვუთხრა იმ ადამიანებს, ვინც ხმა ჩვენს, ნაციონალური მოძრაობის ჯინაზე მიეცით ქვეყნის დაქცევას, ბატონებო, იმ დაქცეულ ნანგრევებში თქვენც მოყვებით. მე საქართველოს მოსახლეობას მინდა ვუთხრა, როდესაც დაიწყებენ პრობლემების ძიებას, უნდა გაიაზრონ, რომ სწორედ ისინი არიან პასუხისმგებლები იმ მდგომარეობაზე, რომელიც დღეს არის ქვეყანაში შექმნილი’’, - განაცხადა აკაკი ბობოხიძემ.

ნინო ექვთიმიშვილი