სამართალი

მზად ვარ, ვუპასუხო ყველა შეკითხვას და მეც მაქვს შეკითხვები პროკურატურასთან - პაატა ბურჭულაძე

საოპერო მომღერალი პაატა ბურჭულაძე ფონდ „იავნანასთან“ დაკავშირებით მიმდინარე სისხლის სამართლის საქმეს სასაცილოს უწოდებს

პაატა ბურჭულაძე წუხელ საქართველოში დაბრუნდა და მზადაა, გამოძიების ყველა შეკითხვას უპასუხოს.

„უნდა მორჩეს ეს უმსგავსობა, რაც ხდება საქართველოში. მე მზად ვარ, ვუპასუხო ყველა შეკითხვას და მეც მაქვს შეკითხვები პროკურატურასთან. რა დანაშაული უნდა იყოს?! სიკეთის მეტი რა გაუკეთებია მაგ ფონდს? სასაცილოა. ხუთი თვე არის უკვე პროკურატურას საბუთები აქვთ ჩვენი წაღებული და ვერაფერი მონახეს და ვერც მონახავენ. მე ძალიან გული მწყდება, რომ პროკურატურა ჩაითრიეს ამ საქმეში“, - განაცხადა პაატა ბურჭულაძემ „რუსთავი2“-თან საუბრისას.

კითხვაზე, რამდენად შესაძლებელია, რომ გამოძიების დაწყება წარსულში მის პოლიტიკურ საქმიანობას უკავშირდებოდეს, პაატა ბურჭულაძე ამბობს, რომ „რა თქმა უნდა, უკავშირდება და მარტო ამას არა, სხვა რამეებსაც“.

პაატა ბურჭულაძეს ფონდ "იავნანას" თანხების გაფლაnნგვის საქმეზე სავარაუდოდ, 9 თებერვალს დაკითხავენ.