სამართალი

მუსტაფა ემრე ჩაბუქისთვის ლტოლვილის სტატუსის მინიჭებაზე უარი ადვოკატებმა გაასაჩივრეს

დემირელის სახელობის სკოლის პედაგოგის მუსტაფა ემრე ჩაბუქისთვის და მისი ოჯახისთვის ლტოლვილის სტატუსის მინიჭებაზე უარი მისმა ადვოკატებმა საქალაქო სასამართლოში გაასაჩივრეს.

ემრე ჩაბუკის ადვოკატის სოსო ბარათაშვილის თქმით, სასამართლოში წარდგენილია დაახლოებით 650 გვერდიანი მტკიცებულებები.

„მათ შორის სახალხო დამცველის, არასამთავრობო ორგანოზაციების დასკვნები და საერთაშორისოო ორგანიზაციების პოზიციები, სადაც მითითებულია, რომ თურქეთში მასიურად ირღვევა ადამიანის უფლებები და დაუშვებელია მუსტაფა ემრე ჩაბუქის თურქეთში ექსტრადიცია. რაც შეეხება სახალხო დამცველს, ის პირდაპირ ამბობს, რომ ლტოლვილთა და განსახლების სამინისტროს გადაწყვეტილება არის დაუსაბუთებელი და უკანონო“,-აღნიშნა ადვოკატმა.

მისი თქმით, მუსტაფა ემრე ჩაბუქი დაუსაბუთებლად, პოლიტიკურად მოტივირებული განჩინებების საფუძველზე უკვე 5 თვეა იმყოფება წინაესქსტრადიციო პატიმრობაში.

„თურქეთის მხარემ ვერ წარმოუდგინა ვერცერთი მტკიცებულება საქართველოს პროკურატურას, რომელიც დაასაბუთებდა, რომ ამ ადამიანის ექსტრადიცია არის შესაძლებელი. რაც შეეხება საექსტრადიციო პროცედურებს, ის ფაქტობრივად ჯერ არ დაწყებულა და ეს სავარაუდოდ მას შემდეგ დაიწყება, რაც ლტოლვილის სტატუსის საკითხი გაირკვევა“,-განმარტა სოსო ბარათაშვილმა.

საქალაქო სასამართლო მუსტაფა ემრე ჩაბუკის სარჩელს 12 ოქტომბერს განიხილავს.

მონიკა დავლიანიძე