სამართალი

მუსტაფა ემრე ჩაბუქი საქართველოს პროკურატურის ბრალდებული არ არის - ირაკლი შოთაძე

საქართველოს მთავარი პროკურორის, ირაკლი შოთაძის განცხადებით, დემირელის კოლეჯის ყოფილი მენეჯერი მუსტაფა ემრე ჩაბუქი არაა ბრალდებული საქაღტველოს პროკურატურის მხრიდან. მან აღნიშნა, რომ უწყება წარადგენს თურქეთის პროკურატურიდან მიღებულ მასალას.

„სისხლის სამართლის სფეროში საერთაშორისო თანამშრომლობის ფარგლებში ჩვენ სასამართლოს მივმართეთ. ჩაბუქის ექსტრადირების დასაშვებობის საკითხის შესწავლა სასამართლოს მიერ ხდება. ჩვენ თურქეთის პროკურატურიდან მიღებულ მასალებს წარვადგენთ. დაცვის მხარე და შესაბამისი დაინტერესებული პირი მის ხელთ არსებულ მასალებს წარადგენენ. სასამართლო შესაბამის გადაწყვეტილებას მიიღებს. ეს ჩვენი ბრალდების სისხლის სამართლის საქმე არ არის. ხსენებული პიროვნება საქართველოს პროკურატურის ბრალდებული არ არის. აქ საუბარი ექსტრადირების პროცესზეა. ეს პროცედურები თურქეთის პროკურატურიდან მიღებული მტკიცებულებების და სისხლის სამართლის საქმის მასალების საფუძველზე სისხლის სამართლის საერთაშორისო თანამშრომლობის კანონით გათვალისწინებულ ფარგლებში ტარდება“, -აღნიშნა შოთაძემ.

მუსტაფა ემრე ჩაბუქის თურქეთში ექსტრადირების სასამართლო განხილვა 19 თებერვლამდე გადაიდო. მისი წინსაექსტრადაციო პატიმრობის დრო საქართველოს საპატიმროში 24 თებერვალს უმთავრდება.

თურქეთის მოქალაქე მუსტაფა ემრე ჩაბუქი 24 მაისს დააკავეს თურქეთის მხარის მოთხოვნით, რომელიც ამტკიცებს, რომ ჩაბუქი ტერორისტული ორგანიზაციის საქმიანობაში იყო ჩართული. დაკავებულსა და მის ოჯახს საქართველოს დევნილთა სამინისტრომ ლტოლვილთა სტატუსსზე უარი უთხრა.