პოლიტიკა

მუქარა იყო პირდაპირი, ასე თქვა, რომ ერთ წელიწადში გაჩვენებთ და ყველა ნახავს, როგორი უნდა იყოს ტელევიზია - ნინია კაკაბაძე ივანიშვილის განცხადებაზე

მედიაექსპერტმა ნინია კაკაბაძემ „ქართული ოცნების“ თავმჯდომარის, ბიძინა ივანიშვილის განცხადება რუსთავი 2-ის შესახებ მუქარად შეაფასა. მისი თქმით, ივანიშვილი რუსთავი 2-ის ხსენებით არხს რეკლამას უწევდა.

„მუქარა იყო პირდაპირი, ასე თქვა, რომ ერთ წელიწადში გაჩვენებთ და ყველა ნახავს, როგორი უნდა იყოს ტელევიზია და როგორ უნდა ისმოდეს განსხვავებული აზრი. 2 საათისა და 20 წუთის განმავლობაში ის ერთადერთი, რასაც აკეთებდა, „რუსთავი 2“-ის რეკლამას აკეთებდა, ლაპარაკობდა ამ არხის მნიშვნელობაზე. ისეთი ადამიანი კი, ვისაც არ მოსწონს ეს არხი, ისიც კი დაიჯერებს "რუსთავი 2"-ის მნიშვნელობას და აუცილებლობას დღეს, თუ რამე გაუჭირდება, ასეთი ადამიანებიც კი დაუდგებიან აწი გვერდში. მე ამ სახით ბიძინა ივანიშვილი ორჯერ მყავს ნანახი. ვამაყობ, რომ ორივე შემთხვევაში ეს სახე მან მიიღო ჩემს მეგობრებთან საუბრისას. ერთი იყო, როდესაც სალომე ასათიანთან ჰქონდა ინტერვიუ და მეორე გუშინ, როდესაც მთავარი წამყვანი, ინტერვიუერი იყო ეკა კვესიტაძე. მას მუდმივად უწევს მონებთან, ერთგულებთან, იმ ადამინებთან ურთიერთობა, ვინც უპირობად იღებს ყველა მის სიტყვას, ეს ნიშნავს, რომ ის არის მეფე, ფეოდალი“,- განაცხადა ნინია კაკაბაძემ.

ივანიშვილმა სამი წამყვანი არხის ჟურნალისტებთან ინტერვიუში განაცხადა, რომ არ ერთ წელიწადში ის მოახერხებს, რომ ყველაფერს თავისი სახელი დაერქვას და ყველამ თავისი ადგილი დაიკავოს, მათ შორის რუსთავი 2-მაც.

„მე დავბრუნდი პოლიტიკაში, სამწუხაროდ, და მე მოვახერხებ, რომ ის ვერტიკალი გუნდში გავამყარო, გუნდში ნიჭიერები უფრო წინ წამოვიდნენ და უფრო აქტიურები გახდნენ. უფრო მკაცრი მოთხოვნები იქნება „ქართული ოცნების“ ყველა წევრის მიმართ. მაქსიმუმ ერთ წელიწადში ჩვენ საზოგადოებაში ყველას თავისი სახელი ერქმევა და ყველას თავისი ადგილი ექნება. „რუსთავი 2“ ვერ შეძლებს საზოგადოების დიდი ნაწილი მძევლად ჰყავდეს და განსხვავებული აზრი არ მოისმინოს. თითქოს სახელმწიფო სახელმწიფოს ფუნქციას ვეღარ ასრულებს ვისაც არ უნდა ყველანი ქუჩაში გამოდიან. ბიზნესი, რომელიც არ უხდის ბიუჯეტს ფულს, გარბის "რუსთავი 2"-ზე და იქიდან გვემუქრება. დღეს ისეთი გრძნობა და შეგრძნებაა, თითქოს სახელმწიფო აღარ არსებობს დრეს ოქუაშვილი, რომელიც ფულს არ უხდის სახელმწიფო ბიუჯეტს...“, -თქვა ივანიშვილმა.