პოლიტიკა

მულტფილმის გმირი გახდა ჩვენი პრემიერ-მინისტრი, იმდენად აცდენილია რეალობას - გია ხუხაშვილი

ექსპერტ გია ხუხაშვილის შეფასებით, რუსეთისადმი პრემიერის მიმართვა არის „ბრიყვული განცხადება, რომელიც არაფრის მომტანი არ არის“.

ხუხაშვილის თქმით, არაადეკვატურია მოსკოვისთვის აფხაზებთან და ოსებთან ურთიერთობის მოგვარების თხოვნა მაშინ, როცა არჩილ ტატუნაშვილის დაღუპვასთან დაკავშირებულ რეზოლუციაში რუსეთი ოკუპანტადაა მოხსენიებული.

„ერთ დღეს, როდესაც იხილავ რეზოლუციის საკითხს და როდესაც მთელი შენი კონცეფცია აგებულია იმაზე, რომ რუსეთი არის ოკუპანტი და ჩვენი პრობლემები არის რუსეთიდან გამომდინარე და ახლა, შენ, ერთ დღეს აღმოაჩინე რაღაც და რუსეთის ხელისუფლებას ეუბნები, რომ მოდი, დამეხმარე ახლა აფხაზებთან ლაპარაკში, ეს ხომ არაადეკვატურია?! გუშინ იღებდნენ რეზოლუციას და იქ ლამის სანქციებზე იყო ლაპარაკი და დღეს აცხადებს, რომ მოდი, რა, ბიძია, შენ ხომ კარგი ბიძია ხარ და ნუ დამჩაგრავ, რა, მოდი, ერთად, რაღაცნაირად, ჩემი პრობლემები გადავწყვიტოთ. პრემიერის ეს განცხადება არის ბრიყვული განცხადება, რომელიც არაფრის მომტანი არ არის და უბრალოდ სასაცილო მდგომარეობაში იგდებს თავს. კარგ შემთხვევაში რუსეთი იტყვის, რომ იცი, რა?! წადი, ოსებს ელაპარაკე, მე რატომ მელაპარაკები, რა შუაში ვარ და ცუდ შემთხვევაში, იტყვის: „მოდი ბიჭი აქ?! ლაპარაკი გინდა?! მოდი ვილაპარაკოთ, დამიჯექი“, - განაცხადა ხუხაშვილმა.

ხუხაშვილმა გიორგი კვირიკაშვილი საბჭოთა მულტფილმის გმირს, კატა ლეოპოლდს შეადარა და განმარტა, რომ პრემიერი აცდენილია რეალობას.

„ზოგადად, ეს არის მიამიტი გაგება პოლიტიკის, რაც ზოგადად დამახასიათებელია პრემიერ-მინისტრისთვის. რუსეთისთვის ასეთი მიმართვა ძალიან სასაცილოდ გამოიყურება, როგორც მინიმუმ და მიამიტი ბავშვი რომ აღმოაჩენს, რომ რაღაც პრობლემაა და ძალიან ბოროტ ბიძიას რომ ეტყვის: „იცი რა?! მოდი, კარგად ვიცხოვროთ". მე ის შევადარე კიდეც კატა ლეოპოლდს, ასეთი რუსული მულტფილმია, სადაც ის ამბობს „ბიჭებო, მოდი ვიმეგობროთ“. დაახლოებით ასე მოიქცა კვირიკაშვილი. ადრე უფრო ბრეჟნევს ვამსგავსებდი, მაგრამ ბრეჟნევი პოლიტიკოსი მაინც იყო და რაღაცას აკეთებდა და ეს ჩამოყალიბდა კატა ლეოპოლდად. რეალური ცხოვრების გმირიც არ არის ხომ უკვე?! მულტფილმის გმირი გახდა ჩვენი პრემიერ-მინისტრი, იმდენად აცდენილია რეალობას", - განაცხადა ექსპერტმა.