პოლიტიკა

მუხთარლისა და ჩაბუქის საქმეები აშშ-ის სახელმწიფო დეპარტამენტის წლიურ ანგარიშში მოხვდა

აშშ-ის სახელმწიფო დეპარტამენტმა ადამიანთა უფლებების მდგომარეობის შესახებ 2017 წლის ანგარიში გამოაქვეყნა, სადაც საუბარია საქართველოზეც. საკითხებს შორის განხილულია აზერბაიჯანელი ჟურნალისტის, აფგან მუხთარლის საქართველოდან გატაცება და დემირელის კოლეჯის მენეჯერის, მუსტაფა ემრე ჩაბუქის საქმეები.

აშშ-ის სახელმწიფო დეპარტამენტის ანგარიშში წერია, რომ მუხთარლიმ საქართველოს ხელისუფლების წარმომადგენლ;ები დაადანაშაულა მის გატაცებასა და აზერბაიჯანულ მხარესტან თანამშრომლობაში. დეტალურად განმარტებულია ის მოვლენები, რაც მუხთარლის გაუჩინარებისა და მისი დაკავების დროს მოხდა.

რაც შეეხება ჩაბუქს, ანგარიშში აღნიშნულია, რომ ადგილობრივმა მთავრობამ არ გაუგრძელა ლიცენზია 2 თურქულ სასწავლო დაწესებულებას, რომლებიც ანკარამ თურქეთის ხელისუფლების მიერ დევნილ ფეთჰულა გიულენთან კავშირში დაადანაშაულა.

ქართული სამოქალაქო სექტორის შეფასებაზე დაყრდნობით ანგარიშში აღნიშნულია, რომ ჩაღლარის ქსელის სკოლებისთვის ლიცენზიის ჩამორთმევა პოლიტიკურად იყო მოტივირებული და ამ კონტექსტში განიხილება ჩაბუქის დაკავება, უარის თქმა მასა და მისი ოჯახისთვის თავშესაფარზე და თურქეთის მოთხოვნით მისთვის წინასაექსტრადიციო პატიმრობის შეფარდება.

გარდა ამისა, კრიტიკულადაა შეფასებული მედიაპლურალიზმი საქართველოში. ანგარიშის თანახმად, ვითარება გააუარესა საზოგადოებრივი მაუწყებლის მენეჯმენტის ცვლილებამ, ასევე მაესტროს, GDS-ისა და იმედის ერთ ჰოლდინგში გაერთიანებამ.