სამართალი

მუხთარლის საქმეზე ახალი არაფერია - ლეილა მუსტაფაევა

აზერბაიჯანელი ჟურნალისტის, აფგან მუხთარლის მეუღლის ლეილა მუსტაფაევას და მუხთარლის ადვოკატის არჩილ ჩოფიკაშვილის გამოკითხვა პროკურატურაში დასრულდა.

როგორც მუსტაფაევამ გამოკითხვის დასრულების შემდეგ მედიას განუცხადა, აზერბაიჯანელი ჟურნალისტის საქმეზე ახალი არაფერია.

„არაფერი ახალი არ არის. მათ არანაირი შედეგი არ აქვთ და ვერაფერი გააკეთეს. მათ აქვთ იმ პირების ფოტო და ვიდეო, ვინც აფგანს უთვალთვალებდა. ჩვენ არ გვაქვს დაზარალებულის სტატუსი. პასუხს ვერ სცემენ კითხვას თუ ვინ და როგორ გაიტაცა აფგან მუხთარლი. მე გადავეცი დღეს ფოტო და ვიდეო მასალა და მითხრეს, რომ გამოიძიებენ. მითხრეს ის, რასაც ყოველთვის მეუბნებიან, თუმცა შედეგი არ არის. სამი თვე გავიდა და დღემდე არაფერი ვიცით. რაც შეეხება აფგან მუხთარლის დაკითხვას საქართველოს პროკურატურის მხრიდან, განმიცხადეს, რომ ამის მექანიზმები არ აქვთ“, -თქვა მუსტაფაევამ.

აფგან მუხტარლი თბილისიდან 29 მაისს გაუჩინარდა. ის აზერბაიჯანში დააკავეს.

მას ბაქოს საქალაქო სასამართლომ წინასწარი სამთვიანი პატიმრობა მიუსაჯა, პროკურატურამ ბრალი კონტრაბანდის, სახელმწიფო საზღვრის უკანონო გადაკვეთის და პოლიციისთვის დაუმორჩილებლობის მუხლებით წარუდგინა.

მონიკა დავლიანიძე