სამართალი

მთვარისა ნავერიანი „რუსთავი 2“-ის გენერალური დირექტორის, ნიკა გვარამიას დაკითხვას ითხოვს

მთვარისა ნავერიანის ადვოკატმა ნიკოლოზ მჟავანაძემ ნავერიანის მიმართ განხორციელებული სიტყვიერი და ფიზიკური ძალადობის გამო, „რუსთავი 2“-ის გენერალური დირექტორის, ნიკა გვარამიაას დაკითხვა მოითხოვა.

ადვოკატმა და დაზარალებულმა ქალბატონმა გენერალურ პროკურორს აღნიშნული განცხადებით განმეორებით მიმართეს.

როგორც ნავერიანმა და მჟავანაძემ პირველ არხს განუცხადეს, ნიკა გვარამიამ 68 დღის წინ, პროკურატურასთან ზაზა სარალიძის მხარდამჭერ აქციაზე იძალადა, რასაც ვიდეოკამერებიდან ამოღებული კადრებიც ადასტურებს.

მიუხედავად ამისა, მთვარისა ნავერიანის თქმით, გვარამია დღემდე არათუ ბრალდებულის, არამედ მოწმის სტატუსითაც არ დაუკითხავს გამოძიებას.

ნავერიანის უფლებადამცველმა განაცხადა, რომ პროკურატურას „რუსთავი 2-ის“ გენერალური დირექტორის დაკითხვაზე მოყვანა ეშინია და საქმე ამდენ ხანს ამიტომაც გაიწელა.

ნავერიანისა და მჟავანაძის თქმით, მათი მოთხოვნების დროულად შეუსრულებლობის შემთხვევაში, ისინი პროკურატურის წინ ფართომასშტაბიანი აქციებს გამართავენ.