პოლიტიკა

„მწვანე ალტერნატივა“ ხანდოს ხეობის მოსახლეობას „აბუნტებს“ ელექტროგადამცემი ხაზების მშენებლობის წინააღმდეგ - კახა კალაძე

საქართველოს ენერგეტიკის მინისტრი კახა კალაძის განცხადებით, გუშინ დუშეთის რაიონში, ხანდოს ხეობაში მოსახლეობის საპროტესტო აქცია წაქეზებული იყო არასამთავრობო ორგანიზაცია „მწვანე ალტერნატივის“ მიერ.

როგორც მინისტრმა თქვა, „მწვანე ალტერნატივა“ ხალხს არასწორ ინფორმაციას აწვდის ელექტროგადამცემი ხაზის ჯანმრთელობაზე შესაძლო ნეგატიური ზემოქმედების შესახებ. კალაძემ აღნიშნა, რომ ხაზები მოსახლეობისგან 100-150 მეტრით იქნება დაშორებული, ერთ მონაკვეთში კი - 40 მეტრით. მისი თქმით, პროექტი ყველა სტანდარტს აკმაყოფილებს და ვერავინ ვერ შეაჩერებს მის განხორციელებას.

გუშინ ხანდოს ხეობის მოსახლეობამ მაღალი ძაბვის ელექტროგადამცემი ხაზების მშენებლობის წინააღმდეგ საპროტესტო აქცია გამართა. აქციაზე მდგომარეობა რამდენჯერმე დაიძაბა. აქციის მონაწილეები სამუშაო ტექნიკის შეჩერებას ცდილობდნენ და იმ ადგილზე ასვლას, სადაც ელექტროგადამცემის მშენებლობა იგეგმება. მათი აზრით, ამ ადგილას სამუშაოების ჩატარება მეწყრის საშიშროებას ზრდის.

ვითარება მას შემდეგ გამწვავდა, რაც ერთ-ერთმა მონაწილემ სამუშაო ტექნიკას ქვა ესროლა და შუშა ჩაუმტვრია. მას მოჰყვა ფიზიკური შეხლა-შემოხლა პოლიციასთან, რის შედეგად დააკავეს 6 პირი.

ანა მებურიშვილი