პოლიტიკა

მთელი სამთავრობო მანქანა მომართულია იმისთვის, რომ გაამართლონ ლევან ყიფიანი - ნატო ჩხეიძე

„ომეგა ჯგუფის“ დამფუძნებლისა და პარლამენტარ ნატო ჩხეიძის მტკიცებით, სამთავრობო მანქანა მომართულია სპორტისა და ახალგაზრდობის ყოფილი მინისტრის, ლევან ყიფიანის გასამართლებლად. ამის შესახებ მან საქალაქო სასამართლოში განაცხადა, სადაც ჩვენებას მისცემს.

„მთელი სამთავრობო მანქანა მომართულია იმისთვის, რომ გაამართლონ ლევან ყიფიანი. ეს არც იყო გასაკვირი. ამიტომაც იყო, რომ არ ვენდობოდით საქართველოს პროკურატურას და მასთან დაკავშირებულ სტრუქტურებს. ისინი იმუშავებენ თავიანთი პროფესიონალიზმისა და მორჩილების შესაბამისად. გავა ხანი, არც თუ ისე დიდი დრო და ლონდონის სასამართლო გადაწყვეტილებით გამოჩნდება ის თუ რა ჩრდილოვანი მმართველობაა საქართველოში“,- აღნიშნა ჩხეიძემ.

დეპუტატის თქმით, ზაზა ოქუაშვილი მზადაა გამოძიებასთან ითანამშრომლოს.

„ ზაზა ოქუაშვილი ამბობს, რომ ის მზად არის ითანამშრომლოს გამოძიებასთან საქართველოს კანონებით განსაზღვრული პროცედურებით. პროკურატურისთვის საჭიროა მისი თანამშრომლობა და ის ამისთვის მზად არის“,- განაცხადა ჩხეიძემ.

შეგახსენებთ, მთავარი პროკურატურის ინფორმაციით, ექსპერტიზის დასკვნის შედეგად, „ომეგა ჯგუფთან“ დაკავშირებულ საკითხზე გავრცელებული ჩანაწერები ავთენტური არ არის და დამზადებულია მონტაჟის გზით.