სამართალი

მთავრობაში ხალხი მიდის-მოდის, მე კი საქართველოს შეიარაღებული ძალების ოფიცერი ვარ - გია ცერცვაძე

უკრაინის სააპელაციო სასამართლოს მიერ წინასწარი დაპატიმრების იზოლატორიდან გათავისუფლებული გია ცერცვძე რუსეთის მიერ მასზე ძებნის გამოცხადების ორ მიზეზს ასახელებს.

როგორც ცერცვაძემ რუსთავი2-თვის მიცემულ ინტერვიუში განაცხადა, რუსეთს ორი ამოცანა ამოძრავებს: პირველი ის, რომ ხელში ჩაიგდოს ის პირები, რომლებიც საქართველოს სამხედრო საიდუმლო ინფორმაციას ფლობენ; და მეორე, რუსეთს სურს დასაჯოს ის ჯარისკაცები, ვინც მათ წინააღმდეგ იბრძოდა.

„რუსეთის ამოცანაა, პირველ რიგში, მაქსიმალურად აიყვანოს ის პირები, ვისაც ჰქონდა და აქვს ინფორმაცია საქართველოს უსაფრთხოებაზე, ანუ სტრატეგიული ობიექტების, საბრძოლო დანაყოფების, სტრუქტურაზე და ასე შემდეგ. ყველაფერი რაც საქართველოს საიდუმლოებას წარმოადგენს. მეორე მოტივი ის არის, რომ სურთ დასაჯონ ის ხალხი, ვინც აქტიურად მონაწილეობდა რუსეთის წინააღმდეგ ბრძოლებში“,-აღნიშნა ვიცე-პოლკოვნიკმა.

ვიცე-პოლსკოვნიკის თქმით, მისთვის შოკის მომგვრელი იყო ის ფაქტი, რომ უკრაინის აეროპორტში დააკავეს, რადგან არანაირ ინფორმაციას წინასწარ არ ფლობდა.

ამასთან, გია ცერცვაძე აღნიშნავს, რომ რუსეთის წინააღმდეგ მომავალშიც, მსოფლიოს ნებისმიერ წერტილში იბრძოლებს.

„ჩემთვის დიდი შოკი იყო, რომ ასე მოხდა. მაგრამ, თუ ბედისწერაა, რომ უნდა დაიღუპო, ჯობია ბრძოლის ველზე, ვიდრე ასე, ცხვარივით რომ დაგკლავენ. ეს იყო დასანანი. რაც არ უნდა მოხდეს, მე მაინც საქართველოს შეიარაღებული ძალების ოფიცერი ვარ. მთავრობაში ხალხი მოდის-მიდის, საქართველო კი, მიანც დარჩება. სანამ შემიძლია, სადაც არ უნდა იყოს, დღეს - უკრაინა, ხვალ-აფრიკა, ყველგან ვიქნები იქ, სადაც ბრძოლა იქნება რუსეთის წინააღმდეგ“,-განაცხადა გია ცერცვაძემ.

მონიკა დავლიანიძე