სამართალი

მთავარმა პროკურატურამ სახალხო დამცველის წინადადება აფგან მუხთარლის საქმესთან დაკავშირებით ნაწილობრივ გაითვალისწინა

საქართველოს მთავარმა პროკურატურამ ნაწილობრივ გაიზიარა საქართველოს სახალხო დამცველის წინადადება აზერბაიჯანელი ჟურნალისტის აფგან მუხთარლის დაზარალებულად ცნობისა და მის მიმართ პოლიციის თანამშრომლების მიერ განხორციელებული შესაძლო დანაშაულის ფაქტზე მიმდინარე სისხლის სამართლის საქმის პროკურატურის გამომძიებლებისთვის გადაცემის თაობაზე, - ნათქვამია სახალხო დამცველის აპარატის განცხადებაში.

,,საქართველოს მთავარი პროკურატურის ცნობით, აფგან მუხთარლის საქმე გამოსაძიებლად საქართველოს მთავარი პროკურატურის საგამოძიებო ნაწილს გადაეცა. რაც შეეხება ჟურნალისტის დაზარალებულად ცნობის საკითხს, მთავარი პროკურატურის განმარტებით, ამგვარი გადაწყვეტილების მიღება მოხდება საქართველოს სისხლის სამართლის საპროცესო კანონმდებლობით გათვალისწინებული საფუძვლების არსებობისას. სახალხო დამცველი არ იზიარებს აღნიშნულ პოზიციას და მიიჩნევს, რომ სახეზეა მუხთარლისთვის დაზარალებულის სტატუსის მინიჭების წინაპირობები“,- აცხადებენ სახალხო დამცველის აპარატში.