სამართალი

მსოფლიოში ყველა მუშაობს, რომ ქვეყნის სპეცსამსახურები განამტკიცოს, საქართველოში მათ დასუსტებას ცდილობენ- ამირან სალუქვაძე

ბრიგადის გენერლის, ანალიტიკოსის სამხედრო-პოლიტიკურ და უსაფრთხოების საკითხებში, ამირან სალუქვაძის განცხადებით, იმ დროს, როდესაც მსოფლიოში ყველა მუშაობს იმისთვის,რომ ქვეყნის სპეცსამსახურები განამტკიცოს, საქართველოში მათ დასუსტებას ცდილობენ.

ამის შესახებ სალუქვაძემ პრესკონფერენციაზე, ე.წ.მოსმენების გასაღების თემასთან დაკავშირებით განაცხადა, რომლის მიხედვით, მმართველი გუნდი გამოდის ინიციატივით, რომ მოსმენების გასაღები სუს-ს ჰქონდეს, ხოლო პრეზიდენტი, არასამთავრობო ორგანიზაციები და ომბუდსმენი აცხადებენ, რომ ამისთვის ცალკე სააგენტო უნდა შეიქმნას.

„დღევანდელ სიტუაციაში, მსოფლიოში არსებული რეალობის გათვალისწინებით, ყველა მუშაობს იმისთვის, რომ განამტკიცოს ქვეყნის სპეცსამსახურები, ჩვენ კი რატომღაც გვინდა, რომ შევასუსტოთ. მე ყველაფერს კამერების წინ ვერ ვიტყვი. არსებობს უამრავი სიტუაცია, როცა სპეცსამსახურმა მყისიერად უნდა იმოქმედოს. აქ საუბარი საათებზეც კი არ არის, ეს არის ანაბანა, ნებისმიერი სახელმწიფოს სპეცსამსახურების წარმომადგენლებს შეეკითხონ. მსოფლიოში არ არსებობს ისეთი მოდელი, რომელსაც გვთავაზობენ. ნებისმიერი ევროპული ქვეყანა, ავიღოთ, დიდი ბრიტანეთი, გერმანია, ბალტიისპირეთის ქვეყნები, რომლებსაც მოსმენებთან დაკავშირებით არ აქვთ ცალკე გამოყოფილი სტრუქტურა, დღეს ნატოში, ევროკავშირში არიან, მაგრამ მსგავსი რამ იქ არ არის, ყველგან არის სხვადასხვაგვარად - ზოგან თავდაცვის სამინისტროს შემადგენლობაშია, ზოგან შინაგან საქმეთა სამინისტროს შემადგენლობაშია სტრუქტურები. სახელმწიფოები ყველგან სხვადასხვაგვარია, მაგრამ აბსოლუტურად ყველგან შედის იმ სტრუქტურებში, რომლებიც ასევე ახორციელებენ საგამოძიებო საქმიანობას“,-განაცხადა ამირან სალუქვაძემ.

მისივე თქმით, პასუხისმგებლობა დაკვეთაზე და უკანონო მოსმენებზე მაქსიმალურად უნდა გამკაცრდეს.

„მაქსიმალურად უნდა გავამკაცროთ პასუხისმგებლობა დაკვეთაზე და უკანონო მოსმენებზე, ეს არის აუცილებელი. რატომღაც ამ მიმართულებით არ ვმუშაობთ, მხოლოდ იმაზეა საუბარი, ვის უნდა მივცეთ ეს ე.წ. გასაღები“,-აღნიშნა სალუქვაძემ.

მონიკა დავლიანიძე