პოლიტიკა

მოვუწოდებდი არასამთავრობოებს, „ნაციონალური მოძრაობის“ მიერ დარიგებულ ვაუჩერებზე ყურადღება გაამახვილონ - გია ვოლსკი

პარლამენტის ვიცე-სპიკერმა, გია ვოლსკიმ არასამთავრობო ორგანიზაციების შეფასებაზე საუბრისას მესამე სექტორი ცალმხრივ და პოლიტიკურად ანგაჟირებულ მიდგომაში დაადანაშაულა.

მისი თქმით, შავ სიაში მყოფი მოქალაქეებისთვის საბანკო დავალიანების ჩამოწერა ამომრჩევლების მოსყიდვას არ წარმოადგენს.

„მე ვერ ვიტყოდი, რომ ეს არის ამომრჩევლის მოსყიდვა. ყველამ იცის, რომ ამ საკითხზე მუშაობა ჯერ კიდევ აპრილიდან დაიწყო და საკმაოდ ინტენსიური რეჟიმით მიმდინარეობდა. მოვუწოდებდი არასამთავრობო ორგანიზაციებს, რომ განსაკუთრებული ყურადღება გაამახვილონ იმ ვაუჩერებზე, რომელიც „ნაციონალური მოძრაობის“ მიერ რიგდებოდა. ვინაიდან ამაზე ყურადღებას არ ამახვილებენ და ცალმხრივი აქვთ შეფასებები უკვე კონკრეტულ გადაწყვეტილებებთან მიმართებაში, ვფიქრობ, რომ ცალმხრივი და პოლიტიკურად ანგაჟირებულია ზოგიერთი მათგანის მიდგომა“,- განაცხადა ვოლსკიმ.

არასამთავრობო ორგანიზაციებმა მთავრობის ახალი ინიციატივა, რომლის მიხედვით 600 ათასზე მეტ მოქალაქეს ბანკების, ონლაინ ორგანიზაციებისა და სხვა საფინანსო ინსტიტუტების მიმართ დავალიანება გაუნულდება, წინასაარჩევნოდ ამომრჩევლის მოსყიდვად შეაფასეს.