პოლიტიკა

მოვუწოდებ პრემიერ-მინისტრს, კეთილი ინებოს და ჩავიდეს პანკისში - გია ხუხაშვილი

პოლიტოლოგმა გია ხუხაშვილმა პანკისის ხეობაში ჩატარებული სპეცოპერაციის გამო მოუწოდა პრემიერ-მინისტრ გიორგი კვირიკაშვილს, ჩავიდეს იქ ადგილობრივებთან შესახვედრად.

„მე მოვუწოდებ პრემიერ-მინისტრს, კეთილი ინებოს და ჩავიდეს პანკისში, იქ არიან საქართველოს მოქალაქეები“, - განაცხადა ხუხაშვილმა რუსთავი 2-თან საუბრისას.

მან არ გამორიცხა, რომ ხეობაში შექმნილი ვითარებით რუსეთმა ისარგებლოს.

„რუსეთისთვის პანკისის ხეობა არის საკმაოდ კარგი საბაბი, იქ განვითარებული შესაძლო დრამატული მოვლენები საკმაოდ კარგი საბაბია იმისა, რომ მორიგი პრეტენზიები, მორიგი აგრესიული ქმედებები ჩაატაროს საქართველოსთან მიმართებაში. რუსეთი ამას გამოიყენებს ძალიან ოსტატურად თუ იქ რაღაც დაძაბულობის კერა გაჩნდა“, - თქვა პოლიტოლოგმა.

ხუხაშვილმა ასევე ისნის სპეცოპერაციას შეეხო. მისი შეფასებით, აჰმედ ჩატაევი საქართველოში, სავარაუდოდ, ძალოვანი სტრუქტურის წარმომადგენლის მეშვეობით მოხვდა.

„მე მაინც მრჩება კითხვები, იგივე, ჩატაევის მიმართ ჩატარებულ ოპერაციასთან დაკავშირებით. გამომდინარე იქიდან, რომ გარანტორის გარეშე ასეთი შესვლები, როგორც წესი, ამ დონის ტერორისტების მხრიდან არ ხდება. მე მაინც მიმაჩნია, რომ ხელისუფლებამ ჯობს, ძალოვან სისტემაში ეძებოს გარანტორი მთელი ამ ისტორიის“, -თქვა ხუხაშვილმა.

სახელმწიფო უსაფრთხოების სამსახურმა თბილისსა და პანკისის ხეობის სოფლებში, ომალოსა და დუისში სპეცოპერაცია 26 დეკემბერს ჩაატარა

სუს-ის ინფორმაციით, დაკავებულია საქართველოს ხუთი მოქალაქე, რომლებიც აჰმედ ჩატაევს საქართველოს საზღვარზე გადმოსვლაში დაეხმარნენ.

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსებზე.

დაკავებულთა შორის არის თემირლან მაჩალიკაშვილიც. სუს-ის ინფორმაციით, პოლიცია იძულებული გახდა პროპორციული ძალა გამოეყენებინა, ვინაიდან თემირლან მაჩალიკაშვილმა წინააღმდეგობის გაწევა და ხელყუმბარის მოქმედებაში მოყვანა სცადა. მისი მდგომარეობა ამ დროისთვის კრიტიკულად მძიმეა.

ანა მებურიშვილი