სამართალი

მოწმემ დაადასტურა, რომ იბერია ტვ-ს ლიცენზიის გადაფორმება ფიქტიურად მოხდა - პროკურორი

თბილისის საქალაქო სასამართლოში ტელეკომპანია ,,იბერიას’’ დახურვისა და სამაუწყებლო ლიცენზიის დათმობის საქმეზე პროცესი ბრალდების მხარის მტკიცებულებათა გამოკვლევით განახლდა.

სხდომათა დარბაზში ბრალდების მხარის მოწმე, ბეგლარ ყიფიანი დაიკითხა.

მოწმის თქმით, მისთვის ტელეკომპანია იბერია ტვ-ს ლიცენზიის დათმობის შესახებ ცნობილია, ვინაიდან მეგობრობდა იმ პირებთან, რომლებზეც ფიქტიურად მოხდა ამ ლიცენზიის გადაფორმება. კერძოდ, მოწმის თქმით, იგი იცნობდა, როგორც ბიძინა ნიჟარაძეს, ისე იოსებ მგელაძეს.

თავის მხრივ, როგორც პროცესის დასრულების შემდეგ საქმის პროკურორმა, ემზარ გაგნიძემ აღნიშნა, მოწმედ გამოძახებულმა ბეგლარ ყიფიანმა დაადასტურა, რომ ტელეკომპანიის ლიცენზიის გადაფორმება ფიქტიურად მოხდა.

,,მოწმემ ისაუბრა ტელეკომპანია ,,იბერიას’’ კუთვნილი ლიცენზიის გადაფორების დეტალებზე. კერძოდ, მან თქვა, რომ ჯერ ლიცენზია ფიქტიურად გაფორმდა დავით კაკაურიძეზე, მისგან ბიძინა ნიჟარაძეზე გადაფორმდა, ხოლო შემდეგ გადაფორმდა ასევე ფიქტიურად იოსებ მგელაძეზე ’’, - განაცხადა ემზარ გაგნიძემ.

შეგახსენებთ, რომ პროკურატურამ ტელეკომპანია ,,იბერიის’’ დახურვისა და სამაუწყებლო ლიცენზიის ჩამორთმევის საქმე 2016 წლის თებერვალში გახსნა. უწყების ინფორმაციით, აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში მიეცა.

საქმეზე მომდევნო სხდომა 17 მაისის 10:00 საათისთვის ჩაინიშნა.

ნინო ექვთიმიშვილი