სამართალი

მოწმემ დაადასტურა, რომ “იბერია ტვ”-ს ლიცენზიის დათმობის გადაწყვეტილება ზურაბ ადეიშვილმა მიიღო - ირაკლი ნადარეიშვილი

მოწმემ დაადასტურა, რომ ტელეკომპანია ,,იბერიას“ ლიცენზიის დათმობის გადაწყვეტილება მიღებულ იქნა, სწორედ ადეიშვილის მიერ და გაჟღერებული იქნა გიორგი ლაცაბიძის მიერ, - განაცხადა ტელეკომპანია ,,იბერიის’’ დახურვისა და სამაუწყებლო ლიცენზიის ჩამორთმევის საქმის პროკურორმა ირაკლი ნადარეიშვილმა თბილისის საქალაქო სასამართლოში გამართული სხდომის შემდეგ.

როგორც ირაკლი ნადარეიშვილმა აღნიშნა, დღევანდელ სასამართლო პროცესზე დაკითხულმა მოწმემ, ბაკურ ჩიქოვანმა თავისი ჩვენებით დაადასტურა გიორგი ლაცაბიძისა და ზურაბ ადეიშვილის ბრალეულობა.

,,კიდევ ერთხელ დაადასტურა მოწმემ ის ფაქტი, რომ სწორედ გიორგი ლაცაბიძის მიერ საკუთარ კაბინეტში მოხდა ტელეკომპანია ,,იბერიას“ ლიცენზიის მოთხოვნის ულტიმატუმის გაჟღერება და სწორედ მისი დავალებით მოხდა აღნიშნული ლიცენზიის დათმობა. მისივე დავალებით მოხდა ტელეკომპანია ,,იბერიას“ წარმომადგენლების წაყვანა შემდგომ უკვე დიმიტრი ქიტოშვილთან, მარეგულირებენ კომისიაში, სადაც უკვე მოხდა დანარჩენი პროცედურების გავლა და შეთანხმება. მოწმემ ხაზგასმით აღნიშნა, რომ ეს იყო ულტიმატუმი და არშესრულების შემთხვევაში, დანარჩენ ,,ომეგა ჯფუფს“ შეექმნებოდა სერიოზული პრობლემები. ასევე, მოწმემ ცალსახად და მკაფიოდ აღნიშნა ის გარემოებაც, რომ ამ ყველაფრის საქმის კურსში იყო ადეიშვილიც და სწორედ ადეიშვილის დავალებით და ადეიშვილთან შეთანხმებით ხდებოდა შემდეგი რესტრუქტურიზაცია და “ომეგა ჯგუფის” საქმის შემდგომი გამოძიების ბედიც. ტელეკომპანიის ლიცენზიის დათმობის გადაწყვეტილებაც მიღებულ იქნა, სწორედ ადეიშვილის მიერ და გაჟღერებული იქნა გიორგი ლაცაბიძის მიერ“, - განაცხადა ირაკლი ნადარეიშვილმა.

ნინო ექვთიმიშვილი