პოლიტიკა

მოწევაზე სანქციები დააზიანებს ბიზნესსა და ტურიზმს - გიგა ბოკერია

საპარლამენტო ფრაქცია „ევროპული საქართველოს“ წევრის, გიგა ბოკერიას განცხადებით, საზოგადოებრივი თავშეყრის ადგილებში მოწევის აკრძალვა უარყოფითად აისახება ბიზნესსა და ტურიზმზე.

ბოკერიას შეფასებით, სანქციები დრაკონულია, ხოლო მწეველთა რაოდენობის შემცირება მხოლოდ მაშინაა შესაძლებელი, როცა მოსახლეობის ეკონომიკური მდგომარეობა გაუმჯობესებულია.

„არავინ არ დაობს, რომ სიგარეტის მოწევა მავნებელია, მაგრამ ერთადერთი გზა იმისკენ, რომ მეტმა ადამინმა იზრუნოს და მეტად იზრუნოს საკუთარ ჯანმრთელობაზე და მათ შორის ნაკლებად მოწიოს, არის ქვეყნის სიღარიბიდან გამოსვლა და გამდიდრება, არა ასეთი დრაკონული რეგულაციები, ისეთი, როგორიც ევროკავშირის ზოგ ქვეყანაში არ არის, როგორც საფრანგეთში, ესტონეთში ან ფინეთში.

ამ კანონის შედეგია, რომ ის ბევრჯერ და ბევრგან იქნება იგნორირებული, ზოგჯერ იქნება კორუფციის წყარო და ყველა შემთხვევაში დააზიანებს ბიზნესსა და ტურიზმს. ანუ აისახება ათასობით ჩვენი მოქალაქის შემოსავალზე, ისინი დაკარგავენ შემოსავალს ან საერთოდ დაკარგავენ სამსახურს, ანუ სრულიად საპირისპირო შედეგს მივიღებთ“,-განაცხადა ბოკერიამ.

ანა მებურიშვილი