პოლიტიკა

მოსკოვი მზადაა ყოველმხრივი პრაქტიკული თანამშრომლობისთვის და ელოდება ქართული მხარის ადეკვატურ რეაქციას - გრიგორი კარასინი

რუსეთის საგარეო საქმეთა მინისტრის მოადგილის, გრიგორი კარასინის განცხადებით, ქართულ-რუსულ ურთიერთიობების ნორმალიზების ტენდენცია რამდენიმე წლის წინ დაიწყო, „როცა სააკაშვილის პარტიამ წააგო საპარლამენტო არჩევნები და ქვეყანაში ახალი ხელისუფლება მივიდა“. მისი მტკიცებით, ორივე ქვეყანამ ვაჭრობისა და ტრანსპორტის სფეროებში თვალსაჩინო შედეგებს მიაღწია, ასევე გამყარდა ჰუმანიტარული კავშირები.

„მხოლოდ 2017 წელს ორმხრივი სავაჭრო ბრუნვა 30%-ზე მეტით გაიზარდა. რუსეთი საქართველოს მეორე მნიშვნელოვანი სავაჭრო პარტნიორი და მისი პროდუქციის, უპირველეს ყოვლისა, ღვინის გასაღების მთავარი ბაზარი გახდა“, -უთხრა კარასინმა „იზვესტიას“.

მან დაამატა, რომ გამშვები პუნქტი „ზემო ლარსის“ რეკონსტრუქცია იგეგმება, რაც გაამარტივებს საზღვრის გადალახვას.

კარასინმა იმედი გამოთქვა, რომ „მომავალში ამ პოზიტიური ტენდეციების განვითარება მოხერხდება“. მისი თქმით, მოსკოვი მზადაა „ყოველმხრივი პრაქტიკული თანამშრომლობისთვის“ და ელოდება „ქართული მხარის ადეკვატურ რეაქციას“.

ანა მებურიშვილი