პოლიტიკა

მოსამართლეების ე.წ. პოლიტიკური ელფერის მქონე საქმეები მათი ზღვარგადასული კრიტიკის მიზეზი არ უნდა გახდეს - დიმიტრი გვრიტიშვილი

იუსტიციის უმაღლესი საბჭოს ახლად არჩეული წევრის, დიმიტრი გვრიტიშვილის განცხადებით, მისი მთავარი ამოცანაა, შეუწყოს ხელი სასამართლოს დამოუკიდებლობის შენარჩუნებას.

გვრიტიშვილი ასევე გამოეხმაურა ლევან მურუსიძისადმი მიმართულ კრიტიკას. საბჭოს ახალი წევრის თქმით, ყველა მოსამართლეს უწევს პოლიტიკური ელფერის მქონე საქმეებზე მუშაობა, მაგრამ ეს შეურაცხმყოფელი კრიტიკის საბაბი არ უნდა გახდეს.

„ლევან მურუსიძის მიმართ ხშირად ისმის დაუსაბუთებელი, ზღვარგადასული კრიტიკა. ეს კრიტიკაც აღარ არის, ეს შეურაცხყოფაა ღირსების შემლახავი. მე პირადად მეამაყება, რომ ლევან მურუსიძის მეგობარი ვარ. რაც შეეხება მოსამართლეების მიმართ არსებულ მოსაზრებებს მათ მიერ განხილული საქმეებიდან გამომდინარე, მეც მაქვს ასეთი რეზონანსული, ე.წ პოლიტიკური ელფერის მქონე საქმეები, რომელთა განხილვაც მოსამართლეებს გვიწევს და მომავალშიც მოგვიწევს, თუმცა, ეს არ უნდა აძლევდეს არავის უფლებას, ზღვარგადასული, შეურაცხმყოფელი შეფასებები გააკეთოს სასამართლოს და ცალკეული მოსამართლეების მიმართ“, - განაცხადა გვრიტიშვილმა.

შეგახსენებთ, დღეს საქართველოს მოსამართლეთა XXI რიგგარეშე კონფერენციაზე იუსტიციის უმაღლესმა საბჭომ ოთხი ახალი წევრი აირჩია. კენჭისყრაზე ყველაზე მეტი ხმა ირაკლი ბონდარენკომ, ვასილ მშვენიერაძემ, დიმიტრი გვრიტიშვილმა და ირაკლი შენგელიამ აიღეს.

საბჭოს ახლად არჩეული წევრები იმ მოსამართლეებს შეცვლიან, რომელთა უფლებამოსილების 4-წლიანი ვადა ამოიწურა. ესენი არიან ლევან მურუსიძე, მერაბ გაბინაშვილი, თამარ ალანია და შოთა გეწაძე.