სამართალი

მოსამართლე ბადრი კოჭლამაზაშვილი ზვიად კუპრავას საქმის განხილვას ჩამოშორდა

მოსამართლე ბადრი კოჭლამაზაშვილმა დააკმაყოფილა ზვიად კუპრავასა და მისი ადვოკატების შუამდგომლობა და საქმის განხილვას ჩამოშორდა.

საუბარია 12 ივნისს თბილისის საქალაქო სასამართლოს სასადილოში მომხდარ ინციდენტზე მიმდინარე პროცესზე, სადაც ზვიად კუპრავას ბრალი წარედგინა სსკ-ის 366-ე მუხლის მეორე ნაწილით, რაც საკონსტიტუციო სასამართლოს წევრის, მოსამართლის ან მსაჯულის შეურაცხყოფას გულისხმობს.

დაცვის მხარე მოსამართლის აცილებას იმ საფუძვლით ითხოვდა, რომ მოსამართლე ბადრი კოჭლამაზაშვილი ბრალდებულთან მიმართებაში ვერ იქნებოდა ობიექტური, „რადგან 2016 წელს სწორედ აღნიშნული მოსამართლის საწინააღმდეგოდ მან საქალაქო სასამართლოსთან გამართა აქცია და დაადანაშაულა მევახშეობაში.

„სასამართლოსთან ჩატარებულ აქციაზე გამოუთქვამს გარკვეული კრიტიკული შენიშვნები და ბრალდებები ჩემს მიმართ. როგორც თვითონ ამბობენ, თურმე მე ბინებს ვაქირავებ და ამ შემოსავლით ვცხოვრობ. სამეწარმეო საქმიანობას მე არ ვახორციელებ. ზვიად კუპრავას მიერ გავრცელებული ინფორმაცია არის ტყუილი, თუმცა იმის გამო, რომ კუპრავას, მის ადვოკატებს და მხარდამჭერებს არ გაუჩნდეთ განცდა, რომ მოსამართლე ამ ცილისწამებლური განცხადებების გამო არის განაწყენებული, მე ამ საქმეს უნდა ჩამოვცილდე", - განაცხადა ბადრი კოჭლამაზაშვილმა.

შემდეგი სხდომის თარიღი მას შემდეგ განისაზღვრება, რაც საქმე სხვა მოსამართლეს დაეწერება.