პოლიტიკა

მორიგი თვალებში ნაცრის შეყრაა - ზაზა ბიბილაშვილი გიორგი გახარიას გამოსვლაზე

„ნაციონალური მოძრაობის“ წევრი ზაზა ბიბილაშვილი დარგობრივი კომიტეტების გაერთიანებულ სხდომაზე შინაგან საქმეთა მინიტრის, გიორგი გახარიას გამოსვლას გამოეხმაურა.

„გახარიას ინიციატივით აღტაცებული ბევრი ადამიანი შემომხვდა დღეს დილას. არადა, მორიგი თვალებში ნაცრის შეყრაა...

რა ახალი დეპარტამენტი? ბიუროკრატია გვაკლია?! ახალი დეპარტამენტები და კომისიები წყვეტენ პრობლემებს?

არა, ბატონებო. აქ მთავარი ხელისუფლების ღირებულებები და პოლიტიკური ნებაა. „ქართული ოცნების“ პირობებში კი ორივე ფუნდამენტური პრობლემაა. გინდათ ამ პრობლემების გადაჭრა? კი ბატონო -

აიღეთ და ნაგავში გადააგდეთ ქურდული სამყაროს რევანშის ძეგლი;

გადააყენეთ სტრასბურგთან მებრძოლი თეა წულუკიანი;

გადააყენეთ მანანა „იქნებშეაგინა“ კობახიძე;

გადააყენეთ მკვლელებისა და ყაჩაღების პოლიტპატიმრად შემრაცხავი ეკა ბესელია;

დასაჯეთ 17 მაისის მოძალადეები;

დასაჯეთ რელიგიურ უმცირესებობზე მოძალადეები;

თბილისში საახალწლო პროგრამის ორგანიზებას ნუ დაუკვეთავთ ბასა ფოცხიშვილებს, რომლებიც კანონის დარღვევას ქართველი ვაჟკაცის თანდაყოლილ ბუნებად მიიჩნევენ;

აღიარეთ, რომ არაკეთილსინდისიერები იყავით, როცა მანდატურის ინსტიტუტს ებრძოდით და რომ ამან ბევრი ოჯახი გააუბედურა;

ციხეში შეაბრუნეთ არჩევნებამდე 3 დღით ადრე გამოშვებული კანონიერი ქურდი, ლავას ოღლი;

გვითხარით, ვინ გააქრო აფგან მუხთარლი და ვისი ბრძანებით წაიშალა მისი გატაცების გზაზე არსებული ყველა ვიდეოკამერის ჩანაწერი;

ჩამოყალიბდით, კრიმინალის ზრდას ისევ გაგებით უნდა მოვეკიდოთ, როგორც ამას თქვენი პატრონი მოგვიწოდებდა თუ აღარ? აბა, შსს რომ გვეუბნება, შემცირდა კრიმინალიო?

სია უსასრულოა და მისი ერთ წინადადებად ჩამოყალიბებაც შეიძლება: აღიარეთ, რომ აბსოლუტურად ყველაფერში ცდებოდით (ან ყველაფერს იტყუებოდით) და გამოაცხადეთ თვითლიკვიდაცია.

...და თუ შედეგი მაინც არ დადგა (არადა, აუცილებლად დადგება), მაშინ ჯანდაბას - შექმენით ახალი დეპარტამენტი“, - დაწერა ბიბილაშვილმა ფეისბუკის საკუთარ გვერდზე.

ანა მებურიშვილი